Ижтимоий тармоқларда Самарқанд вилояти Иштихон туманидаги Оқдарё сув омборида дамба ёрилгани ҳамда сув сатҳи меъёрдан ошиб кетгани ҳақида хабарлар тарқалди. Туман ҳокимлиги буни рад этди.
“Оқдарё сув омборида ҳеч қандай носозликлар ёки хавфли ҳолат юзага келмаган. Сув сатҳи меъёрий даражада бўлиб, дамба ва унга тегишли инфратузилмалар барқарор ҳолатда ишламоқда”, дейилади туман ҳокимлиги матбуот хизмати хабарида.
Таъкидланишича, барча объектлар доимий равишда мутахассислар томонидан назорат қилинмоқда. Оқдарё сув омбори стратегик аҳамиятга эга иншоот сифатида қонунчиликка мувофиқ равишда техник кўрикдан ўтказилиб, унинг хавфсизлиги тўлиқ таъминланган.
Ҳокимлик фуқаролардан тасдиқланмаган маълумотларни тарқатмасликни ҳамда расмий манбаларга таянишни сўради.
13 январь куни Оқдарё сув омборида ёриқлар пайдо бўлгани ҳақида ёлғон ахборот тарқатишда гумонланган шахслар устидан суд бўлиб ўтди. Суд ҳужжати билан танишган “Газета.уз”нинг ёзишича, 1988 йилда туғилган Ж.Ҳ. 2025 йил 10 январь куни Оқдарё сув омборининг жанубий-ғарбий қисми қирғоғида сув омбори ишчи ходимлари томонидан жорий таъмирлаш ишларини олиб борилаётганини ўзининг телефонига видео тасвирга олган. Унда “Мана Иштихон тумани сув омборида сув тошиб кетишига оз қолди, сув омбор ҳам кетай деди” деб, 10 январь куни М.П. билан биргаликда ижтимоий тармоқлар орқали турли гуруҳ ва каналларга тарқатган.
Улар Маъмурий жавобгарлик тўғрисидаги кодекснинг 202−2-моддаси 2-қисмида (Жамоат тартибига ёки хавфсизлигига таҳдид солувчи ёлғон ахборотни тарқатиш) назарда тутилган ҳуқуқбузарликни содир этган деб топилди ва ҳар бирига БҲМнинг 20 баравари миқдорида яъни 7,5 миллион сўмдан жарима жазоси тайинланди.
Оқдарё сув омбори ҳақида
Оқдарё дарёсининг ўзанида жойлашган Оқдарё сув омбори 1989 йилда фойдаланишга топширилган. У 7 баллгача зилзилага бардош беради ва 110 миллион метр куб сув сиғимига эга. Сув омборларида хавфсизлик нуқтаи назаридан доимий кузатишлар олиб борилади. Бундан ташқари, ички ишлар ва миллий гвардия қўриқлаш бўлимлари томонидан омборлар доимий қўриқланади. Оқдарё сув омборига 2011 йилда 8 та видеокузатув мосламаси, 2015 йилда 5 та ташвишли чақирув тугмаси ўрнатилган ва бу ерда ҳам замонавий электростанция ва “С-40” сиренаси мавжуд.
Изоҳ (0)