Россия ҳукумати Қримга тактик ядро қуроли етказиб берувчи қурилмаларни, жумладан Ту-22М3 стратегик бомбардимончиларни ҳамда «Искандар-М» тезкор-тактик ракета мажмуаларини жойлаштиришни режалаштирмоқда.
Бу ҳақда АҚШ конгрессменлари Барак Обамага ёзган мактубларида маълум қилди, дея хабар бермоқда «Коммерсантъ».
АҚШ Сенатининг қуролли кучлар бўйича қўмитаси аъзоси Жеймс Инофе фикрича, бу 1987 йилда Собиқ Иттифоқ томонидан имзоланган ўрта ва кичик масофадаги ракеталарни йўқ қилиш ҳақидаги Битимни тўғридан-тўғри бузишдир.
«Бу Россияга минтақада ҳарбий устунликка эга бўлиб, НАТО базаларига бевосита яқин келиш имконини беради», — дея қайд этди конгрессменлар.
Конгресс аъзоларининг таъкидлашича, Россия раҳбариятининг ноқонуний ҳаракатлари РФ ва НАТО ўртасида 1997 йилда тузилган шартномаларни қўпол равишда бузиб, Россия ҳарбийларига альянс базалари ва объектларида бўлиш имконини беради.
Қонун чиқарувчилар АҚШ президентидан жавоб ҳаракатларини талаб қилмоқда. Улар хусусан альянс аъзолари ва Москва ўртасидаги барча алоқаларни бутунлай узишни, шунингдек Россия ҳарбийларини НАТО базалари ва объектларидан чиқариб юборишни таклиф қилмоқда.
Изоҳ (0)