АҚШнинг ҳарбий ҳаво кучлари X-37B русумли тажрибавий учувчисиз бошқариладиган космик кемаси Ванденберг ҳарбий ҳаво базасига муваффақиятли қўнди. Бу ҳақда база вакилларига таяниб ТАСС хабар бермоқда.
Космик кема орбитада 674 кун ёки 22 ой бўлган. Аввалроқ ушбу миссия АҚШ мудофаа вазирлиги манфаатларини кўзлаб амалга оширилганлиги ҳақида маълум қилинган эди. Аппарат 2012 йилнинг декабрь ойида Atlas 5 ракетаси ёрдамида Флорида штатининг Канаверал бурунидан учирилган.
Космик кема ердан 200—750 километр баландликда парвоз қилишга мўлжалланган. У разведка вазифаларини бажариш, космосга унчалик катта бўлмаган юкларни олиб чиқишга қодир. У шунингдек, жосус-сунъий йўлдошларда қўллаш мумкин бўлган янги асбоб-ускуналарнинг тажрибасини ўтказишда қулайдир.
Қатор экспертларнинг фикрича, мазкур космик кема ҳарбий мақсадларда фойдаланишга, хусусан, душман сунъий йўлдошларини ишдан чиқаришга мўлжалланган. Пентагон эса буни инкор этмоқда ва мазкур космик кема шунчаки янги технологияларни синаб кўриш учун платформа эканлигини таъкидламоқда.
Бу X-37B’ни ишлаб чиқариш ва синаш бўйича дастурни амалга ошириш мақсадида учинчи маротаба учирилиши бўлган. Парвоз ва базага қўниш автоматик равишда амалга оширилган ва, экспертларнинг баҳолашича, жуда муваффақиятли кечган.
X-37 Boeing корпорацияси томонидан ишлаб чиқилган. У тахминан беш тонна парвоз массасига, 8,9 метр узунликка, 2,9 метр баландликка эга. Қанотининг узунлиги 4,5 метрни ташкил этади.
Изоҳ (0)