2014 йил 3 ноябрда «Грин Кард» ёки «Турли Миллатга Мансуб Иммигрантлар Визаси» Лотереясига онлайн режимда рўйхатдан ўтиш муддати тугайди, дея хабар бермоқда АҚШнинг Тошкентдаги элчихонаси расмий сайти.
Америка ҳукумати ушбу дастури орқали 50 000 нафар доимий яшаш ҳуқуқини берувчи визалар ажратади. Визалар сўнгги беш йил мобайнидаги АҚШга иммиграция кўрсаткичлари асосида олти минтақавий ҳудуд орасида тақсимланади; бунда АҚШга иммиграция кўрсаткичлари паст бўлган ҳудудларга кўпроқ визалар миқдори белгиланади.
Визага мурожаат этувчилар компьютер орқали амалга ошириладиган тасодифий танлов лотереяси ёрдамида сараланади. Шахснинг исми лотереяда танланиши унга иммиграцион визага мурожаат этиш жараёнининг кейинги босқичларини ўтиш имкониятини беради.
Рўйхатга олиш даври 2014 йил 3 ноябрь, душанба куни, Тошкент вақти билан cоат 22:00 да тугайди. Барча аризалар электрон равишда рўйхатга олиш даврида http://www.dvlottery.state.gov/ саҳифаси орқали топширилиши шарт.
Элчихона хабарида таъкидланишича, «Грин Кард» Лотереясида рўйхатдан ўтиш бепул жараёндир. «Грин Кард» Лотереяси учун маъмурий тўловлар фақатгина Тошкентдаги АҚШ элчихонасида виза олиш учун суҳбат давомида олинади. Мурожаат этувчиларни элчихонадаги суҳбатдан олдин пул тўлашга ундайдиган ҳар қандай хатлар фирибгарларнинг фаолиятидир.
Изоҳ (0)