20 ёшли М. Мирсобитов ва ҳали вояга етмаган Ж. Ҳошимов тунаш мақсадида таксичи аёлга тажовуз қилди. Бу ҳақда «Ҳуқуқ» газетаси хабар бермоқда.
Такси ушлаб, ҳайдовчини тунашга келишиб олган йигитлар қизил рангли Matiz автомобилини тўхтатди. Рулдаги аёл уларни манзилга етказишга рози бўлди. Манзилга яқинлашиб қолишганида Ж. Ҳошимов рулни хилват кўчага буришни буюрди.
Шу пайт ҳайдовчининг қўл телефони жиринглаб қолди. Телефонга чалғиган ҳайдовчи ҳушёрликни йўқотди. Орқа ўриндиқда ўтирган Жамшид унинг бўйнига сим арқонни ташлаб, куч билан торта бошлади. Аёл қаршилик кўрсата туриб, рулни қўйиб юборди. Миржалол ҳаракатланаётган машинани тўхтатиш учун қўл тормозини тортди. Кейин жон ҳолатда қаршилик кўрсатаётган аёлнинг қорин қисмига зарб билан ура бошлади. Натижада ҳайдовчи ҳушини йўқотди.
Ҳайдовчи аёлни ўлди деб ўйлаб, унинг чўнтакларини титкилаб пул, пластик карточкаси, қўл телефони, тақинчоқлар ва автомашинага тегишли ҳужжатларни олган босқинчилар воқеа жойидан қочишга чоғланишди.
Улар жасаддан қутулиш мақсадида аёлни бир амаллаб орқа ўриндиққа олиб ўтишди. Кейин Миржалол машинани ўт олдириб, хилват кўчалар томон ҳайдаб кетди. Бу орада аёл ҳушига келди. Аммо бу босқинчилардан ҳар нимани кутиш мумкинлигига ақли етиб, ўзини ўлганга солиб ётаверди. Бироз юришгач, Миржалол машинани тўхтатиб, «Шу ерга ташлаб кетамиз», деди. Иккови ҳам тушиб, атрофни бир сидра ўрганиб чиқишди. Яқин орада ҳеч ким йўқлигига ишонч ҳосил қилишгач, машина орқа ўриндиғида беҳуш ётган аёлни ерга туширишди. Улар жўнаб кетишгач, аёл ўрнидан туришга ҳаракат қила бошлади.
Кўчада аёлни кўриб қолган кишилардан бири уни қариндошлариникига олиб бориб қўйди. Улар тезда босқинчилик жинояти ҳақида ҳуқуқ-тартибот органларини хабардор қилишди. Жабрланувчига тез-тиббий ёрдам кўрсатилиб, шифохонага ётқизилди.
Босқинчи йигитчалар шу куниёқ қўлга олинди. Қизиғи, улар босқинчилик йўли билан эгаллаб олган автомашиналарида бироз кира қилишга ҳам улгуришган. Улар суд ҳукми билан узоқ йилга озодликдан маҳрум этилди.
Изоҳ (0)