Ўзбекистон ҳукумати пахта толаси экспортини камайтириш сиёсатини давом эттирмоқда, бу янги ишлаб чиқаришларни яратиш ва пахта толасини қайта ишлашни кўпайтириш ҳисобига бўлмоқда. Бу ҳақда бош вазир Шавкат Мирзиёевнинг бугун Тошкентда очилган Халқаро Ўзбекистон пахта ва тўқимачилик ярмаркасида сўзлаган нутқига таяниб, Gazeta.uz хабар берди. 2015 йил охиригача пахта толасини қайта ишлаш қувватини 500 минг тоннагача етказиш кўзда тутилган.
Пахта бўйича халқаро маслаҳат қўмитаси прогнозига кўра, Ўзбекистон 2014/2015-мавсумда пахта толаси экспортини 2013/2014-мавсумга қараганда 15 фоизга — 500 минг тоннагача камайтиради.
«Ўзбекенгилсаноат» давлат акциядорлик компанияси маълумотларига кўра, 2015—2020 йилларда республикада тўқимачилик соҳасини модернизациялаш учун тахминан 1 миллиард доллар йўналтирилади. Дастур ички пахта толасини қайта ишлаш ҳажмини жорий йилдаги 44 фоиздан 2020 йилда 70 фоизгача оширишни кўзда тутади.
Ҳар йили Ўзбекистонда 3,5 миллион тонна пахта хомашёси ва 1—1,2 миллион тонна пахта толаси ишлаб чиқарилади. Сўнгги ўн йил давомида пахта толасининг мамлакатдаги ички истеъмоли 15 фоиздан 40 фоизгача ўсди.
Изоҳ (0)