Вазирлар Маҳкамасининг 29 июлдаги қарори билан оммавий тадбирларни ташкил этиш ва ўтказиш тартиби белгиланди.
Оммавий тадбирлар биринчи ва иккинчи тоифадаги оммавий тадбирларни ўтказиш объектлари рўйхатига киритилган объектларда ўтказилиши мумкин. Биринчи тоифадаги объектлар рўйхати Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларнинг таклифлари бўйича Вазирлар Маҳкамаси томонидан тасдиқланади. Иккинчи тоифа объектлари эса Қорақалпоғистон Вазирлар Кенгаши, вилоятлар ва Тошкент шаҳар ҳокимликлари томонидан тасдиқланади.
Айрим оммавий тадбирлар Вазирлар Маҳкамаси, Вазирлар Кенгаши, вилоятлар ва Тошкент шаҳар ҳокимликлари қарорлари асосида, рўйхатга киритилмаган жойларда ўтказилиши мумкин.
Оммавий тадбир уни ўтказишда хавфсизликни таъминлаш тўғрисида ички ишлар органлари билан шартнома тузилгандан кейин оммавий тадбирни ўтказиш учун рухсатнома асосида, оммавий тадбир дастурига мувофиқ ташкилотчи томонидан ўтказилади.
Рухсатнома олгунга қадар ташкилотчи ва бошқа шахслар ОАВларда, Интернет тармоғида оммавий тадбирнинг ўтказилиши тўғрисида эълон бериш, реклама материалларини тарқатиш, тадбир жойи, санаси ва вақти тўғрисидаги маълумотларни бошқа тарзда тарқатиш, чипталар сотилишини амалга ошириш ҳуқуқига эга эмас.
Президент ёки Вазирлар Маҳкамаси қарорларида белгиланган оммавий тадбирларни ўтказиш объектларида тадбирларни ўтказиш учун рухсатнома талаб этилмайди.
Рухсатномалар одатда оммавий тадбир ташкилотчисининг аризасида кўрсатилган муайян тадбирни бир маротаба ўтказиш учун берилади.
Изоҳ (0)