O‘zbekistonda ommaviy tadbirlarni o‘tkazish tartibi belgilandi

Vazirlar Mahkamasining 29-iyuldagi qarori bilan ommaviy tadbirlarni tashkil etish va o‘tkazish tartibi belgilandi.

Ommaviy tadbirlar birinchi va ikkinchi toifadagi ommaviy tadbirlarni o‘tkazish obyektlari ro‘yxatiga kiritilgan obyektlarda o‘tkazilishi mumkin. Birinchi toifadagi obyektlar ro‘yxati Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarning takliflari bo‘yicha Vazirlar Mahkamasi tomonidan tasdiqlanadi. Ikkinchi toifa obyektlari esa Qoraqalpog‘iston Vazirlar Kengashi, viloyatlar va Toshkent shahar hokimliklari tomonidan tasdiqlanadi.

Ayrim ommaviy tadbirlar Vazirlar Mahkamasi, Vazirlar Kengashi, viloyatlar va Toshkent shahar hokimliklari qarorlari asosida, ro‘yxatga kiritilmagan joylarda o‘tkazilishi mumkin.

Ommaviy tadbir uni o‘tkazishda xavfsizlikni ta’minlash to‘g‘risida ichki ishlar organlari bilan shartnoma tuzilgandan keyin ommaviy tadbirni o‘tkazish uchun ruxsatnoma asosida, ommaviy tadbir dasturiga muvofiq tashkilotchi tomonidan o‘tkaziladi.

Ruxsatnoma olgunga qadar tashkilotchi va boshqa shaxslar OAVlarda, Internet tarmog‘ida ommaviy tadbirning o‘tkazilishi to‘g‘risida e’lon berish, reklama materiallarini tarqatish, tadbir joyi, sanasi va vaqti to‘g‘risidagi ma’lumotlarni boshqa tarzda tarqatish, chiptalar sotilishini amalga oshirish huquqiga ega emas.

Prezident yoki Vazirlar Mahkamasi qarorlarida belgilangan ommaviy tadbirlarni o‘tkazish obyektlarida tadbirlarni o‘tkazish uchun ruxsatnoma talab etilmaydi.

Ruxsatnomalar odatda ommaviy tadbir tashkilotchisining arizasida ko‘rsatilgan muayyan tadbirni bir marotaba o‘tkazish uchun beriladi.