Ўтган ҳафта пойтахтни Наманган билан боғловчи такси йўналишларига киритилган бир қанча ўзгаришлар кучга кирди. Хусусан, йўловчиларни манзилга етказиш нархи белгилаб қўйилди, деб хабар бермоқда «Анҳор» УзИнформ портали маълумотига таяниб.
Ўзбекистон автомобиль ва дарё транспорти («Ўздарётранс») агентлиги хавфсизликни таъминлаш мақсадида ҳайдовчилар ишини тартибга солмоқда.
Ноқонуний таксиларни тартибга солиш мақсадида 3 августдан бошлаб Наманган — Тошкент — Наманган йўналишида ҳаракатланувчи барча таксилар ҳайдовчилари қайтадан лицензия олишлари талаб этилмоқда.
«Ўздарётранс» янгиликларига мувофиқ, барча ҳайдовчилар хавфсизлик қоидаларини назорат қилувчи янги ташкил этилаётган автомобиль муассасаларига бириктирилади. Лойиҳа доирасида автомобиллар учун таниқлилик белгилари, хусусан, транспорт воситасининг том қисмига «ЙТ» белгиси ва оловранг чироқ ўрнатилади. Йўналишли таксининг олд эшикларига ўртасида айлана билан ажратилиб, «ЙТ» ҳарфлари ёзилган шахмат тартибидаги қора квадратлардан иборат сурат туширилади. Бироқ бундай автомобиллар учун ранг белгиланмаган.
Шунингдек, ҳайдовчиларнинг тўрт соатдан кам бўлмаган дам олиш вақти белгилаб қўйилди.
Қоидаларга кўра, йўлга чиқишдан олдин автомобилга керакли миқдорда бензин қуйилган бўлиши керак.
Бундан ташқари, йўловчи элтиш хизматининг нархи босиб ўтилган ҳар бир километр учун 115 сўм этиб белгиланди. Шунга мувофиқ, 268 километрдан иборат Наманган — Тошкент йўналиши бўйича қатнов 31 минг сўм этиб белгиланди.
«ММА-Меҳмондўст» МЧЖ раҳбари Абдураҳмон Шерғозиевнинг айтишича, белгиланган нарх об-ҳавога қараб ёки байрамлар арафасида ҳам ўзгартирилмайди. «Айни вақтда Намангандан Тошкентга 160 та автомобиль — ‘Нексия’ ва ‘Ласетти’ ҳаракатланмоқда. Бундан ташқари, тошкентлик ҳайдовчилар ҳам мазкур йўналишда фаолият олиб бормоқда», — дейди Шерғозиев.
Шунга ўхшаш ўзгаришлар Фарғона водийсини Тошкент билан боғловчи бошқа йўналишларга ҳам киритилади. Октябрь ойида тендер ўтказилиб, унда ғолиб бўлганлар водий — пойтахт йўналишларига хизмат кўрсатади.
Изоҳ (0)