Ҳиндистон ҳукумати мамлакатдаги мусулмонларини ноқонуний равишда Бангладешга депортация қилишда айбланмоқда. Бу ҳақда The Guardian хабар берди.
Сўнгги ҳафталарда минглаб одамлар, асосан мусулмонлар, “ноқонуний муҳожирлар” деб гумон қилиниб, полиция томонидан бутун Ҳиндистон бўйлаб ҳибсга олинган. Уларнинг кўпчилиги тегишли ҳуқуқий жараёндан маҳрум қилинган ва чегарадан ўтиб, қўшни мусулмонлар яшайдиган Бангладешга жўнатилган.
Ҳуқуқшунослар ва депортация қилинганларнинг сўзларига кўра, ноқонуний депортация қилинганлар орасида Ҳиндистон фуқаролари ҳам бор. Таъкидланишича, депортацияга қаршилик кўрсатишга уринганлар Ҳиндистон чегара хавфсизлик кучлари томонидан қурол билан таҳдид қилинган.
Ўшандан бери 200 га яқин одам Бангладеш чегарачилари томонидан Ҳиндистон фуқаролари экани аниқлангандан сўнг Нью Деҳлига қайтарилган. Уларнинг баъзилари уйларига бориш учун хавфли ҳудудлар бўйлаб бир неча километр пиёда юришга мажбур бўлгани айтилган.
“Ҳиндистон тегишли қонуний тартиб-қоидаларга риоя қилиш ўрнига, асосан мусулмонлар ва ўз мамлакатидаги кам таъминланган аҳолини ҳеч қандай розиликсиз Бангладешга сиқиб чиқармоқда. Ҳиндистоннинг бу ҳаракати миллий ва халқаро ҳуқуққа зиддир”, деди Бангладешнинг Одҳикар инсон ҳуқуқлари ташкилоти катта илмий ходими Таскин Фаҳмина.
Бангладеш ташқи ишлар вазирлиги Ҳиндистон расмийларига одамларни маслаҳатлашмасдан ва текширмасдан чегарадан ўтказишни тўхтатишга чақирувчи хатлар ёзганини маълум қилган. Аммо бу хатлар жавобсиз қолгани айтилган.
Ҳукмрон ҳинд миллатчи Бҳаратия Жаната партияси (БЖП) ҳукуматининг “ноқонуний бангладешликлар”га қарши кучайиб бораётган жазо чоралари апрель ойида Ҳиндистон томонидан бошқариладиган Кашмир вилоятида исломий жангарилар ҳужуми оқибатида кучга кирганини маълум қилган. Ўшанда 25 та ҳинд сайёҳи ва гид ҳалок бўлган эди. Шундан сўнг БЖП ҳукумати “бегоналарни” чиқариб юборишни бошлаган эди.
Ҳукуматдаги 11 йиллик фаолияти давомида БЖП ҳукумати мамлакатнинг 200 миллион мусулмонини таъқиб қилиш ва ҳуқуқларидан маҳрум қилишда айбланган эди. Сўнгги ҳафталарда мусулмонларни депортация қилиш шимоли-шарқий Ассам штатида содир бўлган. Расмийлар сўнгги кунларда ҳибсга олинган 100 га яқин одам бедарак йўқолганини маълум қилган.
Пойтахт Деҳли, шунингдек, Гужарат, Ражастон ва Махараштра штатларидан ҳам юзлаб одамлар, асосан мусулмонлар депортация қилинган. Гужаратда полиция 6 500 дан ортиқ “Бангладеш фуқаролари”ни қўлга олганини даъво қилган. Кейинчалик уларнинг атиги 450 таси ноқонуний деб топилгани эълон қилинган. Ўтган ҳафта Бангладеш чегарачилари Мумбайда полиция томонидан олиб кетилган ва депортация қилинган 4 нафар мусулмон эркакни Ғарбий Бенгалия штатидан келган ҳиндистонлик меҳнат муҳожирлари экани аниқлангач, ортга қайтарганди.
Изоҳ (0)