Хабарингиз бор, ҳамюртимиз Руслан Чагаев яқинда Грозний шаҳрида бўлиб ўтган жангда пуэрто-рикалик боксчи Фрес Окендо устидан ғалаба қозониб, WBA йўналиши бўйича чемпионлик камарини қўлга киритди.
Ушбу жангдан олдин Руслан Чагаев шарафига Россия мадҳияси янграгани турли гап-сўзларга сабаб бўлди, деб ёзади Uff.uz. Кўпчилик Чагаев Россия фуқаролигини олганлиги ҳақида фикр билдирди.
Бироқ ҳамюртимизнинг ўзи бу гап-сўзларни рад этиб чиқди. У Россиянинг Sovsport.ru сайтига берган интервьюсида бу ҳақда гапириб ўтди.
«Жангдан олдин Сизнинг шарафингизга Россия мадҳияси янграгани кўпчиликни ажаблантирди. Сиз фуқаролигингизни ўзгартирдингизми ёки бу жанг ташкилотчиларининг ғоясимиди?», — деган саволга жавобан, Чагаев фуқаролигини ўзгартирмаганини таъкидлади. «Мен Ўзбекистон фуқароси бўлиб қоламан. Жанг Россияда бўлаётгани туфайли ташкилотчилар шундай йўл тутишга қарор қилишди, — деди у. — Бунинг устига мен ушбу жангга Грознийдаги «Аҳмат» клубида тайёргарлик кўрдим. Аммо регламент бўйича Ўзбекистон мадҳияси янграши керак эди».
Изоҳ (0)