Аргентина ва Голландия терма жамоалари ўртасида кечган жаҳон чемпионати ярим финал учрашуви кеча ўтказилган Бразилия — Германия қарама-қаршилигидан анча фарқ қилди. Энг асосий фарқ шундаки, бу сафарги ярим финалда асосий вақтда бирорта ҳам гол киритилмади, деб ёзади Uff.uz.
Учрашувнинг биринчи бўлимида Аргентина терма жамоаси анча устунликка эга бўлди. Аммо Лионель Месси жамоадошлари билан биргаликда бу устунликдан фойдалана олмади. Иккинчи бўлим эса тенг курашлар остида кечди. Шу билан бирга ўйин анча зерикарли кўриниш олганини ҳам таъкидлаш лозим. Асосий вақтнинг сўнгги дақиқасида Арен Роббен барчасига нуқта қўйиши мумкин эди. Аммо бирга-бир вазиятга чиқиб борган ярим ҳимоячи сўнгги зарбани беришга журъат эта олмади ва ҳаяллаб қолди. Оқибатда Хавьер Маскерано унинг зарбаси йўлига тўғаноқ бўлишга улгурди.
Ўйиннинг асосий вақтига монанд тарзда қўшимча бўлимларда ҳам гол киритилмади ва учрашув тақдири пенальтилар сериясида ҳал бўлди. Бу сафар Луи ван Гал асосий дарвозабон ўрнига Тим Крулни майдонга туширишга қарор қилмади. Умуман, Голландия ўтган сафарги ўйиндан фарқли ўлароқ бу сафар «омад лотерея»сида мутлақо ишончсиз ҳаракат қилди ва Аргентинага имкониятни бой берди.
Шу тариқа жаҳон чемпионати финалида Германия ва Аргентина терма жамоалари куч синашадиган бўлди.
ЖЧ — 2014
1/2 финал
Голландия – Аргентина 0:0 (пеналтилар серияси - 2:4)Голландия – Силессен, де Врей, Влар, Мартинс Инди (Янмат, 46), Кюйт, Н. де Ёнг (Класи, 62), Вейналдум, Блинд, Снейдер, ван Перси (Хунтелар, 96), Роббен.Аргентина – Ромеро, Сабалета, Гарай, Демичелис, Рохо, Энсо Перес (Паласио, 81), Маскерано, Биглия, Месси, Лавесси (М. Родригес, 101), Игуаин (Агуэро, 82).Пеналтилар серияси: 1:0, 1:1, 2:1, 2:2, 2:3, 2:4.Огоҳлантиришлар: Мартинс Инди (45), Демичелис (49), Хунтелар (105).
Изоҳ (0)