ФИФА интизом қўмитаси Уругвай терма жамоаси ҳужумчиси Луис Суаресга нисбатан жазо чораларини қабул қилди. Бу ҳақда Uff.uz хабар берди.
Унга кўра, Луис Суарес Уругвай терма жамоаси таркибида тўққизта расмий ўйиндан четлатилди. Ҳужумчи учун бу жазо 28 июнда Колумбия ва Уругвай терма жамоалари ўртасида нимчорак финал доирасида кечадиган учрашувдан бошланади. Суарес бу ўйинда ва ундан кейин ўтказиладиган яна саккизта расмий учрашувда иштирок эта олмайди.
Шунингдек, Луис Суарес тўрт ой давомида футболга оид ҳар қандай фаолият тури билан (футболчи, мураббий, маъмур ва бошқа соҳа) шуғулланиши қатъиян тақиқланди. Луис Суарес тақиқ муддати давомида ўйинлар вақтида ҳар қандай футбол стадионига кириш ҳуқуқидан маҳрум этилган. Шу билан бирга футболчи 100 минг Швейцария франки миқдорида жарима тўлайди.
Эслатиб ўтамиз, Луис Суарес Уругвай терма жамоаси таркибида ЖЧ гуруҳ босқичи, сўнгги турида Италия терма жамоасига қарши кечган баҳсда рақиб ҳимоячиси Келлинини тишлаб олган эди.
Изоҳ (0)