Президент Ислом Каримовнинг 18 июндаги қарори билан республика ихтисослаштирилган «Қурилишмашлизинг» компаниясини тузиш тасдиқланди.
Ҳужжатда айтилишича, компанияни яратишдан мақсад қурилиш соҳасида лизинг хизматларини янада ривожлантириш, замонавий қурилиш техникаси, машина ва механизмлар, кичик механизация воситалари ва махсус транспорт билан жиҳозлаш асосида қурилиш ташкилотлари техника базасини мустаҳкамлашдан иборат.
22 миллиард сўмлик устав фондига эга янги компанияга Иқтисодиёт вазирлиги, Молия вазирлиги, Давлат архитектура ва қурилиш қўмитаси, Ташқи иқтисодий фаолият миллий банки, «Асакабанк» ДАТБ, «Ўзсаноатқурилиш банк» ОАТБ ва бошқа акциядорлар таъсисчилик қилади.
Республика ихтисослаштирилган «Қурилишмашлизинг» компаниясига қурилиш техникаси, машина ва механизмлар, кичик механизация воситалари ва махсус транспортларни лизинг бўйича етказиб бериш бўйича маркетинг тадқиқотлари ўтказиш, қурилиш ташкилотларининг буюртмаларини йиғиш, умумлаштириш ва таҳлил қилиш вазифалари юклатилди.
Яқин ойлар ичида мамлакатнинг барча ҳудудларида «Қурилишмашлизинг» компаниясининг филиаллари тузилиши керак.
Изоҳ (0)