Бразилия суди ФИФА’га жаҳон чемпионати учрашувларида танаффус жорий қилиш мажбуриятини юклади

Ҳуқуқий масалалар бўйича Бразилия суди ФИФА’га 2014 йилги жаҳон чемпионатининг барча матчларида ҳаво ҳарорати 32 даражадан юқори бўлса, ҳар ярим соатда танаффус уюштириб туриш мажбуриятини юклади. Буни футболчиларга сув ичиб олиш имкониятини бериш мақсадида жорий қилишмоқчи, дея хабар берди Gazeta.ru.

Агар ФИФА ушбу буйруқни бажармаса, ҳар бир учрашув учун 200 минг реал (тахминан 90 минг доллар) миқдорида жарима тўлайди.

Ҳукм мустақил давлат прокурорларининг футболчилар номидан берган шикоятлари асосида чиқарилди. Улар Бразилия қонунчилигида ҳаво ҳарорати 32 даражадан ошса, матчларда танаффус қилиш кераклиги ҳақидаги моддани топиб олишган.

ФИФА вакили Делиа Фишернинг айтишича, ҳозирча ҳеч қайси матчда ҳарорат 32 даражадан ошмаган.