Нигерия терма жамоаси аъзоси Ўзбекистон қовунининг Бразилияникидан ширинлигини таъкидлади

Бугун, 16 июнь куни Эрон билан ўйнайдиган Нигерия терма жамоаси аъзоси Питер Одемвингие Sportbox.ru мухбирига берган интервьюсида Ўзбекистонда яшаган йиллари хотираси билан бўлишди.

Журналистнинг: «Қаерда қовун ширинроқ: Бразилиядами, Тошкентдами?» — саволига у: «Тошкентда, албатта!» — дея жавоб берди. Футболчи, шунингдек, Бразилия об-ҳавоси Тошкентники билан ўхшашлигини таъкидлади.

«Ўзбекистонлик арбитр Равшан Эрматов билан алоқада бўлиб турасизми?» — деган саволга жавобан эса, уни сўнгги марта Олимпия ўйинларида кўрганини, қулай вазият бўлиб қолса, шу ерда (Бразилияда) ҳам кўришиши мумкинлигини айтиб ўтди.

Мухбир ҳакамлар ташқи дунё билан боғланишларига йўл қўйилмаслигини айтгач эса, «Балки аэропортда дуч келиб қолармиз», — деб қўшиб қўйди.

Россия ва Нигерия футболчиси, Нигерия терма жамоаси ҳужумчиси Питер Одемвингие 1981 йилда Тошкентда туғилган.1993 йилда Россияга кўчиб ўтиб, у ерда КАМАЗ ва ЦСКА ёшлар клубларида ўйнаган.