ЖЧ-2014: Аргентина 2:1 ҳисобида Босния ва Герцеговинани мағлубиятга учратди

Бразилиянинг машҳур «Маракана» стадионида Аргентина билан Босния ва Герцеговина жамоалари ўзаро баҳс олиб боришди. Унда Аргентина 2:1 ҳисобида Босния ва Герцеговина устидан ғалаба қозонди, дея хабар беради «Olamsport».

Учрашув Аргентинанинг тезкор ҳужуми билан бошланди. Аргентина рақиб жарима майдончаси олдида ўзи учун жарима зарбаси ишлаб олди. Мессининг жаримадан узатиб берган тўпига Рохо боши билан зарба берди ва тўп йўл-йўлакай Колашинацнинг оёғига тегиб, кутилмаганда дарвозадан жой олди, 1:0.

Иккинчи бўлимда вазият тамомила ўзгарди. Алехандро Сабелла танаффусдан сўнг бирдан иккита ўзгаришни амалга оширди. Ҳимоячи Кампаньяро ўрнига Гаго ва ярим ҳимояда ҳаракат қилган Макси Родригез ўрнига ҳужумчи Игуаинлар майдонга ташланди. Бу эса жамоа ўйинига ўзгартириш олиб кира олди. Аргентина иккинчи бўлимни биринчисига нисбатан анча ҳужумкор ўтказди. Мессининг фаол ҳаракатларини кўп маротаба рақиб ҳимоячилари «ўқий» олишаётганди. Лекин учрашувнинг 65-дақиқасига келиб, Игуаин билан «девор» услубида комбинация қилган Месси ўзининг кучли ва аниқ зарбаси билан Бегович дарвозасини ишғол эта олди — 2:0!

Лекин Босния ва Герцеговина жамоаси бу голдан кейин ҳам тақдирга тан бермай олдинга интилишда давом этишди. Захирадан майдонга туширилган Ведад Ибишевич ўйиннинг 84-дақиқасида Ромеронинг оёқлари орасидаги тўпни дарвозага жойлаб қўйди, 2:1. Қолган дақиқалар мобайнида боснияликлар хавфли вазиятлар ярата олишмади.

Шундай қилиб, Аргентина мусобақани ғалаба билан бошлади. Босния ва Герцеговина эса ўзининг илк ўйинида мағлубиятни тан олишига тўғри келди.

ЖЧ-2014. «F» гуруҳи, 1-тур.

Аргентина — Босния ва Герцеговина 2:1

16 июнь. 03:00

Голлар: Колашинац (3, ўз дарвозасига), Месси (65), Ибишевич (84)

Бош ҳакам: Жоел Агуилар (Сальвадор)

Ёрдамчи ҳакамлар: Виллиам Торрес (Сальвадор), Жуан Зумба (Сальвадор)

Захира ҳаками: Жамол Ҳаимуди (Жазоир)

Аргентина: Ромеро, Гарай, Кампаняро (Гаго, 46), Сабалета, Ди Мария, Месси, Родригез (Игуаин, 46), Маскерано, Рохо, Фернандез, Агуэро (Биглиа, 87).

Босния ва Герцеговина: Бегович, Бичакчич, Спахич, Колашинац, Бесич, Пянич, Мисимович (Медунянин, 74), Жеко, Мужя (Ибишевич, 69), Лулич, Хайрович (Виска, 71).

Огоҳлантиришлар: Рохо (25), Спахич (63)