Facebook фойдаланувчилари мақтови туфайли «Корзинка» ходимаси дўкон раҳбарияти томонидан тақдирланди

Facebook’даги «Potrebitel.uz» гуруҳи аъзолари шарофати билан пойтахтимизнинг Шайхонтоҳур тумани Қоратош мавзесидаги «Корзинка» дўкони кассачиси Марғуба Одилова дўкон раҳбарияти томонидан «Авенью Парк» дам олиш зонасига йўлланма ва «Харидорлар яхши кўрадиган кассачи» фахрий ёрлиғи билан тақдирланди.

Гап шундаки, бир неча кун аввал гуруҳ аъзоларидан бири Марғубани хушмуомалалиги, чаққонлиги ва ёрдамсеварлиги учун мақтаб пост қолдирган эди. Унга 700 га яқин «лайк» босилиб, 50 дан ошиқ изоҳлар ёзилган. Изоҳларда бошқа фойдаланувчилар ҳам Марғубанинг ҳақиқатан яхши ходим эканини тан олиб, ундан миннатдор бўлган.

Кеча эса «Корзинка» раҳбарияти вакили шу гуруҳнинг ўзида Марғубанинг тақдирлангани ҳақида хабар қолдириб, исбот сифатида суратлар илова қилди. Ушбу пост аввалгисидан ҳам кўра кўпроқ — 1200 тага яқин «лайк», деярли 90 та изоҳ йиғди.

Таъкидлаш жоиз, ушбу постга фикр билдирганлар «Корзинка» ходимини меҳнатсеварлиги учун, раҳбариятни ўринли рағбат учун мақтаган бўлса, кассачи қиз ҳақида илиқ фикр қолдириб пост ёзган фойдаланувчи эса ташаббуси учун олқишланди.

Шунингдек, «Potrebitel.uz» гуруҳининг ўзига яраша роли ҳам эътибордан четда қолмади.