Facebook’dagi “Potrebitel.uz” guruhi a’zolari sharofati bilan poytaxtimizning Shayxontohur tumani Qoratosh mavzesidagi “Korzinka” do‘koni kassachisi Marg‘uba Odilova do‘kon rahbariyati tomonidan “Avenyu Park” dam olish zonasiga yo‘llanma va “Xaridorlar yaxshi ko‘radigan kassachi” faxriy yorlig‘i bilan taqdirlandi.
Gap shundaki, bir necha kun avval guruh a’zolaridan biri Marg‘ubaning xushmuomalaligi, chaqqonligi va yordamsevarligi uchun maqtab post qoldirgan edi. Unga 700 ga yaqin “layk” bosilib, 50 dan oshiq izohlar yozilgan. Izohlarda boshqa foydalanuvchilar ham Marg‘ubaning haqiqatan yaxshi xodim ekanini tan olib, undan minnatdor bo‘lgan.
Kecha esa “Korzinka” rahbariyati vakili shu guruhning o‘zida Marg‘ubaning taqdirlangani haqida xabar qoldirib, isbot sifatida suratlar ilova qildi. Ushbu post avvalgisidan ham ko‘ra ko‘proq — 1200 taga yaqin “layk”, deyarli 90 ta izoh yig‘di.
Ta’kidlash joiz, ushbu postga fikr bildirganlar “Korzinka” xodimini mehnatsevarligi uchun, rahbariyatni o‘rinli rag‘bat uchun maqtagan bo‘lsa, kassachi qiz haqida iliq fikr qoldirib post yozgan foydalanuvchi esa tashabbusi uchun olqishlandi.
Shuningdek, “Potrebitel.uz” guruhining o‘ziga yarasha roli ham e’tibordan chetda qolmadi.
Izoh (0)