Тошкентдаги хонадонлардан бирида меҳмон бўлиб ўтирган Баҳодир Азимов (исм-фамилиялар «Ҳуқуқ» газетаси томонидан ўзгартирилган) уй эгасининг жонига қасд қилиб, 18 йилга озодликдан маҳрум этилди.
«Ҳуқуқ» газетасининг Бош прокуратура бошқармаси катта терговчиси Толиб Тўраевга асосланиб хабар беришича, Баҳодир Азимов ва Шербек Соипов пойтахтнинг Чилонзор туманидаги кафелардан бирида Александр Жирков исмли шахс билан танишиб қолган. Жирков янги танишларини ўз уйига меҳмондорчиликка таклиф этган. Кеч бўлишига қарамай, Б. Азимов ва Ш. Соипов янги улфатининг таклифига рози бўлиб, Жирков хонадонига борган. У ерда уларни Сарвар Шокиров ва Темур Алиев кутиб олган. Спиртли ичимликлар таъсирида меҳмонлар ва мезбонлар ўртасида келишмовчилик юзага келган. Натижада маст бўлиб қолган Азимов Алиев ҳамда Шокировга пичоқ билан ташланган ва уларга оғир тан жароҳати етказади. Хонадон соҳиби — Жирков оғайниларига ташланаётган Азимовнинг қўлидан пичоқни тортиб олмоқчи бўлган. Аммо Б. Азимов унга бўйсунмай, қўлидаги совуқ қурол билан хонадон соҳибига ташланган ҳамда унинг кўкрак, қорин ва бел соҳаларига бир неча бор пичоқ уриб, ҳаётига зомин бўлган. Азимовга кучи етмаслигини тушунган Алиев кўчага чиқиб кетган ва кўп қон йўқотиши оқибатида ҳушини йўқотиб йиқилган. Ўзига келганида эса тез ёрдам ва Ички ишлар бошқармаси ходимлари ёнида турганини кўрган.
Хабарда таъкидланишича, ичкиликбозлик ортидан икки йигитнинг жонига қасд қилиб, уларга оғир тан жароҳати етказган ҳамда уни уйига таклиф қилган Александр Жирковнинг қотилига айланган Б. Азимовга жиноят ишлари бўйича Тошкент шаҳар суди томонидан 18 га озодликдан маҳрум этиш жазоси тайинланган.
Изоҳ (0)