Toshkentda mastlik oqibatida qotillik sodir etgan fuqaro 18 yilga qamaldi
Toshkentdagi xonadonlardan birida mehmon bo‘lib o‘tirgan Bahodir Azimov (ism-familiyalar “Huquq” gazetasi tomonidan o‘zgartirilgan) uy egasining joniga qasd qilib, 18 yilga ozodlikdan mahrum etildi.
“Huquq” gazetasining Bosh prokuratura boshqarmasi katta tergovchisi Tolib To‘rayevga asoslanib xabar berishicha, Bahodir Azimov va Sherbek Soipov poytaxtning Chilonzor tumanidagi kafelardan birida Aleksandr Jirkov ismli shaxs bilan tanishib qolgan. Jirkov yangi tanishlarini o‘z uyiga mehmondorchilikka taklif etgan. Kech bo‘lishiga qaramay, B. Azimov va Sh. Soipov yangi ulfatining taklifiga rozi bo‘lib, Jirkov xonadoniga borgan. U yerda ularni Sarvar Shokirov va Temur Aliyev kutib olgan. Spirtli ichimliklar ta’sirida mehmonlar va mezbonlar o‘rtasida kelishmovchilik yuzaga kelgan. Natijada mast bo‘lib qolgan Azimov Aliyev hamda Shokirovga pichoq bilan tashlangan va ularga og‘ir tan jarohati yetkazadi. Xonadon sohibi — Jirkov og‘aynilariga tashlanayotgan Azimovning qo‘lidan pichoqni tortib olmoqchi bo‘lgan. Ammo B. Azimov unga bo‘ysunmay, qo‘lidagi sovuq qurol bilan xonadon sohibiga tashlangan hamda uning ko‘krak, qorin va bel sohalariga bir necha bor pichoq urib, hayotiga zomin bo‘lgan. Azimovga kuchi yetmasligini tushungan Aliyev ko‘chaga chiqib ketgan va ko‘p qon yo‘qotishi oqibatida hushini yo‘qotib yiqilgan. O‘ziga kelganida esa tez yordam va Ichki ishlar boshqarmasi xodimlari yonida turganini ko‘rgan.
Xabarda ta’kidlanishicha, ichkilikbozlik ortidan ikki yigitning joniga qasd qilib, ularga og‘ir tan jarohati yetkazgan hamda uni uyiga taklif qilgan Aleksandr Jirkovning qotiliga aylangan B. Azimovga jinoyat ishlari bo‘yicha Toshkent shahar sudi tomonidan 18 ga ozodlikdan mahrum etish jazosi tayinlangan.
