Тошкентда Халқаро оила куни муносабати билан ФHDЁ бўлимининг янги биноси ишга туширилди
15 май – Халқаро оила куни муносабати билан Тошкентдаги Шайхонтоҳур тумани ФHDЁ бўлимининг янги биноси фойдаланишга топширилди, деб ёзади ЎзА.
ФHDЁ органларининг 2013—2014 йиллар учун моддий-техник базасини мустаҳкамлашга доир дастурга мувофиқ ишга туширилаётган замонавий бинолар мамлакатда оилани ҳар томонлама қўллаб-қувватлаш, айниқса, ёш оилалар учун қулай турмуш шароити яратиш борасида олиб борилаётган кенг кўламли ишларнинг амалий ифодасидир.
– Миллий меъморлик ҳамда замонавий архитектура анъаналари асосида барпо этилган мазкур бино шинам ва ҳар томонлама қулайлиги билан алоҳида аҳамиятга эга, – дейди Шайхонтоҳур туман ФHDЁ бўлими мудири Озода Абдуазизова. – Замонавий жиҳозланган маросимлар зали, она ва бола, ҳужжатларни сақлаш ҳамда фуқароларга хизмат кўрсатиш хоналари бу ерга ташриф буюрадиган аҳолини хушнуд этиши шубҳасиз.
ФHDЁ бўлими янги биносини ишга тушириш муносабати билан ўтказилган тадбирда унинг қошида ташкил этилган «Ёш оила қурувчилар мактаби»нинг фаол аъзолари тақдирланди. Шу билан бирга, катта ҳаёт остонасида турган ёшларнинг никоҳлари қайд этилди.
