Ислом Каримов 14 май куни Жиноят кодексига ўзгартиш киритиб, пора бериш ва порахўрликда воситачилик қилиш учун жазони кучайтирадиган қонунни имзолади. Қонун Олий Мажлис Қонунчилик палатаси томонидан 2 апрелда қабул қилиниб, Сенат томонидан 10 апрелда тасдиқланди. Бу ҳақда gazeta.uz хабар берди.

15 майдан Жиноят кодексининг 211- (Пора бериш) ва 212- (Пора олиш-беришда воситачилик қилиш) моддалари қайта таҳрирланади.

Янгиланган 211-моддага кўра, пора бериш энг кам иш ҳақининг 50 дан 100 бараваригача миқдорда жарима ёки беш йилгача озодликдан маҳрум қилиш билан жазоланади. Модданинг аввалги мазмуни ушбу жиноят учун энг кам ойлик иш ҳақининг эллик бараваригача миқдорда жарима ёки уч йилгача ахлоқ тузатиш ишлари ёхуд олти ойгача қамоқ ёки уч йилгача озодликдан маҳрум қилиш билан жазоланишини кўзда тутган.

Пора бериш такроран, хавфли рецидевист ёки илгари ушбу Кодекснинг 210- (Пора олиш) ёки 212- (Пора олиш-беришда воситачилик қилиш) моддаларида назарда тутилган жиноятларни содир этган шахс томонидан кўп миқдорда содир этилган бўлса, беш йилдан ўн йилгача озодликдан маҳрум қилиш билан жазоланади (аввалги таҳрирда — 3 йилдан 5 йилгача).

Пора бериш жуда кўп миқдорда уюшган гуруҳ манфаатларини кўзлаб, масъул мансабдор шахс томонидан содир этилган бўлса, 10 йилдан 15 йилгача озодликдан маҳрум қилиш билан жазоланади (аввалги таҳрирда — 5—10 йил).

Башарти, шахсга нисбатан пора сўраб товламачилик қилинган бўлса ёки бу шахс жиноий ҳаракатлар содир этилганидан 30 сутка ичида бу ҳақда ўз ихтиёри билан арз қилса, чин кўнгилдан пушаймон бўлиб, жиноятни очишда фаол ёрдам берган бўлса, бундай шахс жавобгарликдан озод этилади.

212-модданинг янги таҳрири пора олиш-беришда воситачилик қилиш учун энг кам ойлик иш ҳақининг 50 баробаридан 100 бараваригача миқдорда жарима ёки беш йилгача озодликдан маҳрум қилиш билан жазоланишини назарда тутади (аввал 50 бараваригача, уч йил ахлоқ тузатиш ишлари ёхуд олти ойгача қамоқ ёки уч йилгача озодликдан маҳрум этиш).