HTC One М8 смартфони олтин ва платинадан ишланган корпусларда тақдим этилди

Аввал ваъда қилинганидек, HTC’нинг янги флагмани One (М8) олтиндан ишланган корпусда чиқарилди. Бу ҳақда mail.ru хабар берди.

Британиянинг Goldgenie заргарлик компанияси HTC One (М8)нинг учта шоҳона вариантини таклиф қилади. Булар тоза олтин, пуштиранг олтин ва платинадан ишланган смартфонлардир. Ушбу қурилмаларнинг нархлари мос равишда 2560, 2695 ва 2830 долларга тенг.

Смартфонларнинг ҳар бири эмандан ясалган ўзига хос совға қутисига солинган. Уларга ҳимоя ғилофи илова қилинади.

Эслатиб ўтамиз, янги смартфон ўзидан олдингисидан каттароқ ҳажми, янада мустаҳкам метал корпуси ва иккиталик камераси билан фарқ қилади. Янги смартфон 5 дюймли экран ва яп-янги Snapdragon 801 процессорига эга. Аввалги версиядаги силлиқланган метал корпус сақланиб қолди. Бироқ ундан фарқли равишда, янги HTC One қирралари янада айланароқ кўриниш олди.

HTC One (М8) 2 Гб тезкор ва 16 Гб ички хотирага эга. У Google Android 4.4 KitKat операцион тизимида ишлайди. Телефон 3G ва LTE тармоқларида ишлай олади, бундан ташқари, қувватни тежаш режимига эга бўлиб, 14 кун давомида қўнғироқ ва SMSлар қабул қилиши мумкин.

Тўқ кулранг ва кумушранг тусдаги смартфон Тошкентдаги «Флешка» савдо мажмуасида 2,4 миллион сўмдан сотилмоқда.