АҚШ фуқаролар ҳуқуқлари ҳимояси соҳасида жаҳон етакчиси ролини олди, бироқ аввал Вашингтон ўз мамлакатида бу соҳани тартибга солиши зарур, деб ҳисоблайди Пхенян.
«РИА Новости» хабар беришича, Корея Марказий телеграф агентлиги (КМТА) АҚШда ирқий дискриминация борлигини қайд этган. Шимолий Корея ОАВлари ўтказган сўров натижаларига кўра, сўралган америкаликларнинг 52 фоизи мамлакатда ирқчилик борлигини тасдиқлаган, 42 фоизи эса бундай дискриминациянинг абадий бўлишига ишонч билдирган.
КМТА фикрича, АҚШ «қип-қизил жаҳаннамнинг ўзи», чунки у ерда энг оддий инсон ҳуқуқлари «шафқатсизларча бузилмоқда». Ишсизлар сонининг ошиб бораётгани, уй-жой нархининг осмонлаётгани, қашшоқларнинг кўпаяётгани, болаларнинг катта қисми ўз ёшига мос равишда овқатланмаслиги каби фактлар далил сифатида келтирилди.
Шунингдек, АҚШнинг БМТ рейтингида қотилликлар сони бўйича биринчи ўринда туриши, энг кўп маҳбуслар ҳам АҚШ ҳудудида экани (2,2 миллион) қайд этилди. «Давлат ахлоқ тузатиш муассасаларида жой йўқлиги туфайли хусусий қамоқхоналар оммалашиб бормоқда», — деб ёзади КМТА.
Шимолий Корея ОАВлари ушбу муаммоларга қарамай, Барак Обама «чет эл сафарларига юз миллионлаб доллар сарфлаётгани», ўз халқининг яшаш шароитларига қизиқмаётганини таъкидлар экан, «АҚШ — инсон ҳуқуқларини ҳимоя қилиш соҳасида энг ёмон давлат», — дея хулоса қилди.
Изоҳ (0)