Европарламент Россияга санкцияларни кучайтиришни таклиф қилди
17 апрель куни Европарламент резолюция қабул қилди. Унда ЕИ Кенгашини Россияга нисбатан иккинчи босқич санкциясини кучайтириш ва учинчи иқтисодий санкцияга тезлик билан ўтишга чақирди. Бу ҳақда France Presse хабар берди. Бунга сабаб қилиб депутатлар Россия томонидан Украинадаги «сепаратистлар ва жангарилар» қўллаб-қувватланаётганини келтирди.
Депутатлар фикрича, Россиянинг ЕИдаги инвестиция ва активларига нисбатан чоралар кўриш ҳамда Россия билан келишувларни қайта кўриб чиқиб, баъзиларини тўхтатиш керак. Европарламентдагилар «Жанубий оқим» газ қувури қурилмаслиги керак эди, деб ҳисоблаб, газ етказиб беришнинг бошқа манбасини топишни таклиф қилмоқда.
Бундан ташқари, депутатлар резолюцияда Қрим ва унинг раҳбариятига нисбатан иқтисодий, савдо ва молиявий чекловлар киритишга чақирди. Ҳужжатни 437 депутат ёқлаб овоз берди, 49 киши қарши чиқди.
Европа қонунчилигига кўра, Европарламент резолюцияси қонун чиқарувчи статусга эга эмас ва унинг бажарилиши мажбурий эмас. Бироқ ЕИнинг ижро этувчи ҳукумати органи бўлган Еврокомиссия ушбу тавсияларга қулоқ тутса, Россия компаниялари иштирокидаги йирик энергетика лойиҳалари санкция таъсирига тушиши мумкин.
