Америкалик олимлар биринчи маротаба галактикамизда Ер катталигидаги сайёрага дуч келди, унда биологик ҳаёт бўлиши мумкин. Бу ҳақда «ИТАР-ТАСС» хабар берди.
Янги сайёра 2009 йил мартида орбитага туширилган, мутахассислар орасида «сайёралар овчиси» лақаби билан машҳур бўлган «Кеплер» телескопи ёрдамида аниқланган. Шу сабабли сайёрага Кеплер-186f шартли номи берилди.
NASA’нинг астрофизика бошқармаси бошлиғи Пол Герцнинг таъкидлашича, янги экзосайёра ўз юлдузидан қулай узоқликда жойлашган, бу унга ўз юзасида мўътадил ҳароратни ушлаб туришига ва суюқ ҳолатдаги сувга эга бўлишига имкон беради.
Кеплер-186f Ердан 500 ёруғлик йили узоқлигида жойлашган. У Қуёшдан икки баробар кичик бўлган қизил юлдуз атрофида айланади. Айланиш даври 130 кунга тенг. Сайёранинг оғирлиги, таркиби ва атмосфераси ҳали ўрганилганича йўқ.
Янги сайёрада ҳаёт борлиги ҳам ҳали аниқ бўлмаган факт. Космик марказ мутахассисининг айтишича, Кеплер-186f’нинг Ер билан ўхшаш жиҳатлари жуда кўп, бироқ уларни «эгизаклар эмас, холаваччалар, деса тўғрироқ бўлади».
Изоҳ (0)