АҚШ давлат котиби Украинадаги тўқнашув иштирокчиларини зўравонликдан воз кечишга чақирди

Украинада қаршилик кўрсатаётган томонларнинг барчаси зўравонлик ва провокациядан воз кечиши керак, дея АҚШ давлат котиби Жон Керри Женевадаги тўрт томонлама учрашув хулосаларини эълон қилди. Бу ҳақда «Интерфакс» хабар берди.

«Биз экстремизм, ирқчилик, бошқаларнинг динига ҳурматсизликнинг ҳар қандай кўринишини қатъий қоралаймиз ва четлаштирамиз, — деди АҚШ давлат котиби.

Керри учрашувда Қримнинг Россияга қўшилиши масаласи кўрилмаганини қайд этди. «Бироқ бу борадаги фикрлар хилма-хиллиги қолди», — деди у. Шунингдек, давлат котиби агарда Украинадаги тангликни ҳал қилиш борасида прогресс кўринмаса, Россияга қарши қўшимча санкциялар киритилишини таъкидлади.

Керри Украинанинг мамлакатда очиқ конституцион ислоҳот ўтказишга тайёрлигини эълон қилди. Буни учрашувда Украина ТИВ Андрей Дешица маълум қилган.

Бундан аввал Россия ТИВ раҳбари Сергей Лавров Женевадаги учрашув иштирокчилари Украинадаги барча ноқонуний қуролланган уюшмаларни таслим бўлишга чақирганини маълум қилган эди.

Учрашувда Украина, Россия, ЕИ ва АҚШ ташқи сиёсий идоралари раҳбарлари қатнашди. Лавров ва Керри юзма-юз музокаралар олиб борди. Учрашувда Украинадаги танглик ва ундан чиқиш йўллари муҳокама қилинди.