Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш (СВОЖЖДЛҚК) департаментининг Андижон вилояти бошқармаси ва шаҳар бўлими ходимлари томонидан ҳамкорликда ўтказилган тезкор тадбирда «Эски шаҳар» Марказий деҳқон бозори ОАЖ ҳудудида ҳаракатланаётган «Нексия» русумли автомашина тўхтатилган. Текширув чоғида салондан Қирғизистон Республикаси акциз маркалари билан елимланган LD номли 500 қути, Pall Mall номли 500 қути, «Беломорканал» номли 54 қути, жами 1 054 қути ҳамда Ўзбекистон Республикаси акциз маркалари билан елимланган 17 турдаги 1 380 қути тамаки маҳсулотлари топилиб, ашёвий далил сифатида олинган. Бу ҳақда «Ҳуқуқ» газетаси хабар берди.
СВОЖЖДЛҚК департаментининг Андижон вилоят бошқармаси матбуот гуруҳи катта инспектори Дилшодбек Мирзаевнинг ёзишича, ушбу ҳолат юзасидан олиб борилган суриштирувлар давомида фуқаро С. Маматўхтаев юқоридаги тамаки маҳсулотларини опаси С. Имомхўжаевага тегишли бўлган Андижон шаҳри, Янги-турмуш МФЙ, Янги-турмуш кўчасидаги хонадонда сақлаб келаётганлиги аниқланган.
С. Маматўхтаевнинг кўрсатмасига асосан, ходимлар томонидан мазкур хонадон кўздан кечирилганда, тегишли ҳужжатлари бўлмаган Қирғизистон Республикаси акциз маркалари билан елимланган 1 150 қути LD, 370 қути Pine, 71 қути «Беломорканал», жами 1 591 қути, Ўзбекистон Республикаси аксиз маркалари билан елимланган 33 турдаги 3 870 қути тамаки маҳсулотлари ҳамда Покистон Республикасида ишлаб чиқарилган 3 250 қути «Авион» номли гугурт маҳсулотлари мавжудлиги аниқланиб, ашёвий далил сифатида олинган.
Мазкур ҳолат юзасидан жиноят иши қўзғатилиб, айбдорларга нисбатан жазо муқаррарлиги таъминланди.
Изоҳ (0)