O‘zbekiston Yevropaning Stadler kompaniyasidan ikkita harakatlanuvchi tarkib xarid qilishni rejalashtirmoqda. Bu haqda 30-sentyabr kuni bo‘lib o‘tgan Senatning ellik sakkizinchi yalpi majlisida transport vaziri Ilhom Mahkamov ma’lum qildi.
Ilhom Mahkamovning aytishicha, “O‘zbekiston-2030” rivojlanish strategiyasida har yili harakat tarkiblarini yangilash belgilangan.
Kupe, platskart yo‘nalishida va o‘rindiqli harakat tarkiblarini xarid qilish uchun alohida dastur qilingan. Bunda O‘zbekiston bo‘ylab 5 soatgacha bo‘lgan yo‘nalishlarda elektropoyezdlarni xarid qilish ko‘zda tutilgan.
Joriy yilda Xivaga qadar temiryo‘l tizimini elektrlashtirish yakuniga yetkaziladi. U yo‘nalishda xarid qilinadigan Janubiy Koreyaning Hyundai Rotem harakat tarkiblari yo‘lga qo‘yiladi. Bu, albatta, hamma talablarga javob beradigan harakat tarkiblari. Bundan tashqari Yevropaning Shtadler kompaniyasidan ikkita harakat tarkibi xarid qilinmoqda. Bu O‘zbekiston yo‘llarida ko‘rib, ishlatilganidan so‘ng, uni kattaroq ko‘lamda son jihatdan ko‘proq xarid qilish qarori qabul qilinadi, dedi transport vaziri
Avvalroq transport vaziri Ilhom Mahkamov bugungi kungacha barcha yo‘lovchi tashish xizmati tariflari Iqtisod va moliya vazirligi hamda Monopoliyaga qarshi kurashish qo‘mitasi bilan kelishilgan holda belgilanganini aytib o‘tgan edi.
Izoh (0)