“Rossiya temir yo‘llari” ochiq aksiyadorlik jamiyati O‘zbekistonda o‘z vakolatxonasini ochadi. Bu haqda jamiyat matbuot xizmati xabar berdi.
Rossiya bosh vaziri o‘rinbosari Vitaliy Savelyev boshchiligidagi delegatsiya 18-sentyabr kuni O‘zbekiston rasmiylari — Shavkat Mirziyoyev, bosh vazir Abdulla Aripov, transport vaziri Ilhom Mahkamov bilan qator uchrashuvlar o‘tkazdi. Toshentda bo‘lib o‘tgan muzokaralarda “Rossiya temir yo‘llari” rahbari Oleg Belozyorov ham ishtirok etgan.
Xabarda aytilishicha, “Rossiya temir yo‘llari” va o‘zbekistonlik hamkorlar xalqaro infratuzilma loyihalarini birgalikda amalga oshirish, yo‘lovchi tashishni rivojlantirish, logistika xizmatlarini kengaytirish, raqamlashtirish, ta’lim dasturlari va gumanitar hamkorlik kabi keng yo‘nalishlarda ish olib bormoqda.
“O‘zbekiston temir yo‘llari” AJ tomonidan tuzilgan Toshkent—Moskva poyezdlari qatnovining qayta tiklangani hamkorlikning asosiy natijalaridan biri bo‘ldi. Poyezd 24-sentyabrdan haftasiga bir marta, 15-dekabrdan esa haftada ikki marta yangi jadval joriy etilgandan so‘ng harakatlana boshlaydi.
Sayyohlik poyezdlari yo‘nalishlari variantlari ham birgalikda ko‘rib chiqilmoqda.
Yuk tashish segmentida “Agroekspress” tezlashtirilgan muzlatgichli konteyner poyezdini yo‘lga qo‘yish ustida ish olib borilmoqda.
Yaqin kunlarda O‘zbekistonda “Rossiya temir yo‘llari”ning vakolatxonasi ochiladi.
Izoh (0)