Urganch xalqaro aeroportini davlat-xususiy sheriklik asosida modernizatsiya qilish va boshqarish bo‘yicha tenderda Janubiy Koreyaning Incheon International Airport Corporation kompaniyasi g‘olib bo‘ldi. Bu haqda Uzbekistan Airports matbuot xizmati xabar berdi.
“Urganch xalqaro aeroportini modernizatsiya qilish va boshqarish” loyihasining “Qurish-boshqarish-topshirish” bo‘yicha ochiq tenderi 2024-yilning 1-avgustida e’lon qilingan edi. Xabarda aytilishicha, tanlov ikki bosqichda bo‘lib o‘tdi: malaka so‘rovi (RfQ) va takliflar so‘rovi (RfP). Tenderda sakkizta kompaniya ishtirok etdi, ulardan beshtasi ikkinchi yakuniy bosqichga o‘tdi, shundan so‘ng idoralararo tender komissiyasi g‘olibni aniqladi.
Davlat-xususiy sheriklik loyihasi aeroportni modernizatsiya qilish va boshqarish loyihasini birgalikda amalga oshirishni nazarda tutadi. Xususiy sherik yo‘lovchi va yuk terminallarini qurish va boshqarish, shu jumladan yerda xizmat ko‘rsatish ishlarini amalga oshiradi. Davlat sherigi aerodrom majmuasini qurish va boshqarish (uchish-qo‘nish yo‘lagi, perron) uchun javobgarlikni o‘ziga oladi. Loyihaga ko‘ra keyingi qadam 19 yillik konsessiya muddatini o‘z ichiga olgan DXSH shartnomasini tuzish bo‘ladi.
“Tanlov g‘olibi bo‘lgan Incheon xalqaro aeroporti nafaqat Koreya Respublikasining asosiy havo darvozasi, balki Shimoliy-Sharqiy Osiyodagi eng yirik transport markazlaridan biri bo‘lib, u bir necha marotaba dunyoning eng rivojlangan va gavjum aeroportlari 10 taligiga kirgan. 2024-yil yakunlari bo‘yicha aeroport 70 million yo‘lovchiga xizmat ko‘rsatgan.
Urganchdagi loyihani amalga oshiradigan jamoa Xorazm aeroportini yo‘lovchilar uchun eng zamonaviy va qulay aeroportlardan biriga aylantirib, mintaqaning xorijlik sayyohlar uchun jozibadorligini oshirishiga va, umuman, O‘zbekiston aviatsiya sohasini rivojlantirishga hissa qo‘shishiga ishonamiz” deya izoh berdi Uzbekistan Airports kompaniyasi.
Urganch xalqaro aeroportini modernizatsiya qilish va boshqarish bo‘yicha davlat-xususiy sheriklik loyihasi prezidentning 2024-yil 30-avgustdagi qarori ijrosi doirasida Uzbekistan Airports AJ tomonidan Transport hamda Iqtisodiyot va moliya vazirliklari bilan hamkorlikda amalga oshirilmoqda.
Izoh (0)