Ta’mirlash ishlari sabab yopilgan Urganch xalqaro aeroporti rejada belgilangan vaqtdan avvalroq — 5-avgust kuni ochiladi. Bu haqda Uzbekistan Airports matbuot xizmati xabar berdi.
Urganch xalqaro aeroporti uchish-qo‘nish yo‘lagini kapital ta’mirlash ishlari boshlangani munosabati bilan 20-iyul kuni o‘z faoliyatini vaqtincha to‘xtatgan edi. Rejaga muvofiq ta’mirlash ishlari aeroportda 7-avgustga qadar amalga oshirilishi ko‘zda tutilgandi.
Qurilish-ta’mirlash ishlari belgilangan muddatdan avvalroq yakunlangani munosabati bilan ushbu aeroport 5-avgust kuni Toshkent vaqti bilan soat 11:00 da o‘z faoliyatini tiklaydi.
Ma’lum qilinishicha, ikki hafta ichida katta hajmdagi ishlar amalga oshirildi. Jumladan, uzunligi 3000 m va eni 45 m bo‘lgan uchish-qo‘nish yo‘lagi qoplamasi almashtirildi va mustahkamlandi, ikkinchi va uchinchi yurish yo‘laklari kapital ta’mirlandi. Bu aeroportga Boeing 787 va Airbus A330 kabi keng fyuzelyajli samolyotlarni cheklovlarsiz qabul qilish va, o‘z navbatida, Urganch shahriga reyslar soni va yo‘lovchilar oqimini ko‘paytirish imkonini beradi.
Urganch shahridagi uchish-qo‘nish yo‘lagini kapital rekonstruksiya qilish ishlari oxirgi marta 1997-yilda, shikastlangan qismlarini qisman ta’mirlash esa 2018-yilda amalga oshirilgan.
Izoh (0)