Kapital ta’mirlash sabab 20-iyuldan 7-avgustgacha yopilayotgan Urganch aeroportidan Nukus aeroportigacha bepul transfer yo‘lga qo‘yiladi. Bu haqda Uzbekistan Airports matbuot xizmati xabar berdi.
Iyun oxirlarida Urganch xalqaro aeroporti 20-iyul soat 00:01 dan 7-avgust 23:59 gacha faoliyatini to‘xtatishi to‘g‘risida xabar berilgandi. Uchish-qo‘nish yo‘lagining uzoq muddatdan beri ishlashi hamda samolyotlarning qo‘nishi va uchishi xavfsizligini ta’minlash maqsadida kapital qurilish va ta’mirlash ishlari olib boriladi.
Rekonstruksiya davrida barcha rejalashtirilgan reyslar Nukus xalqaro aeroportiga yo‘naltiriladi. Uzbekistan Airports yo‘lovchilarga Nukus va Urganch aeroportlari o‘rtasida bepul transfer xizmatini taqdim etadi. Avtobuslar yo‘lovchilarni jo‘nab ketishda ham, uchib kelishda ham manzil aeroportiga olib boradi.
Masalan, Urganchdan Moskvaga HY-9615 reysi bilan uchayotgan yo‘lovchilar Urganch aeroportiga soat 23:00 da yetib kelishlari lozim. Jadvalga ko‘ra, avtobuslar yo‘lovchilarni Urganch aeroportidan soat 23:30 da olib ketadi. Soat 02:30 da yo‘lovchilar Nukus aeroportiga yetkaziladi va u yerdan Moskvaga uchishadi. Moskvadan qaytgan yo‘lovchilarni Nukusdan Urganchga yetkazish jarayoni ham xuddi shunday tashkil etiladi. Nukus aeroportida chegara nazoratidan o‘tib, yuklarni qabul qilib olgan yo‘lovchilarni Urganchga yo‘l oladigan avtobuslar kutib turadi.
Har bir alohida yo‘nalish bo‘yicha to‘liq avtobuslar qatnovi jadvali bilan ushbu havola orqali tanishish mumkin.
Bir necha kun oldin Termiz aeroportidagi aerodrom majmuasini rekonstruksiya qilish ishlari to‘liq yakunlangani to‘g‘risida xabar berilgandi. Aerodromning har bir yurish yo‘lagining tayanch qismi kengligi 23 metr, umumiy eni esa 44 metrga yetkazilgan bo‘lib, bu Boeing787/777, Airbus 330 kabi keng fyuzelyajli samolyotlarga cheklovlarsiz yurish imkonini beradi.
Izoh (0)