Toshkentdagi avtobuslarning birida ayollar va erkaklar joyi ajratilganini targ‘ib qiluvchi qog‘oz yopishtirilgani aks etgan surat tarqaldi. “Toshshahartransxizmat” bunga munosabat bildirib, uni noma’lum shaxslar yopishtirib ketganini bildirdi.
Ma’lum qilinishicha, avtobusdagi kuzatuv kamerasidan olingan tasvirlarga ko‘ra, uni 5-noyabr kuni 7-avtobus saroyi filiali tasarrufidagi, 34-sonli yo‘nalishga biriktirilgan avtobusga ikki yigit yopishtirgan. Yigitlar posterni telefoniga suratga olgan va avtobusdan tushib ketgan.
“Toshshahartransxizmat” mazkur ikki fuqaroning shaxsiga aniqlik kiritish va qilgan xatti-harakatlariga huquqiy baho berish hamda ularga qonuniy jazo choralarini qo‘llash uchun huquqni muhofaza qiluvchi organlarga murojaat yo‘llagan.
Shuningdek, qayd etilishicha, yuqoridagi kabi holatlarning oldini olish maqsadida barcha avtobus haydovchilari va chiptachilari o‘rtasida navbatdan tashqari yo‘riqnomalar o‘tkazilmoqda, haydovchi va chiptachilardan yanada hushyor holda ish yuritishlari yuzasidan tushuntirish ishlari olib borilmoqda.
Bundan avval Samarqanddagi avtobusda xuddi shunday qog‘oz yopishtirilgandi. U olib tashlanib, viloyat transport boshqarmasi bunday holat takrorlanmasligi uchun haydovchilar bilan suhbat o‘tkazgandi.
2023-yilda ham Toshkentdagi avtobusda shu kabi holat kuzatilgandi. Isuzu avtobusiga ayollar va erkaklar o‘tirishi uchun alohida joylar ajratilgani yozilgan qog‘oz yopishtirilgan. “Toshshahartransxizmat” tomonidan bu e’lon zudlik bilan olib tashlangan.
Izoh (1)
Bilasizki jamoat transportida odamlar bir biri bilan juda tiqilinch holda ketadi. Aslida mantiqan olib qaralsa, begona ayol va erkaklar(voyaga yetmagan o'g'il qizlar)ni aralashib, bir biri bilan jips holda noqulay vaziyatda ketganidan ko'ra ayol va qizlar bir tomonda erkak va o'g'il bolalar bir tomonda ketgani maqul. Axir qizingiz yoki ayolingizni bunday holda ketishini xohlamasangiz kerak albatta.
Jamoat transportida fuqarolar qayerda ketishi ularning ixtiyorida, shunday ekan targ'ibot qog'ozini tavsiyaviy o'rinda ham ishlatish mumkin. Masalan "ayollar old tomoda, erkaklar orqa tomonda o'tirishi tavsiya etiladi".