Qashqadaryo viloyatida yashovchi tadbirkor Islom Hamroyev MXX (hozirgi DXX) sobiq zobiti, xizmatning Surxondaryo viloyati boshqarmasi tergov bo‘limi boshlig‘i sifatida faoliyat yuritgan Nodir To‘raqulovdan jabrlangan. U 2014-yili Nodir To‘raqulov topshirig‘i bilan 97 kun qamoqda saqlanib, 475 ming dollar pulini oldirib qo‘ygan.
2014-yil iyun oyida Qarshi shahridagi sport kompleksi oldida turganimda fuqaro kiyimida bo‘lgan 3-4 kishi yonimga kelib, boshimga qop kiydirgan holda Captiva avtomobiliga mindirib, Surxondaryoga olib ketishdi. Yetib borganimizda Nodir To‘raqulovga qo‘ng‘iroq qilib, aytilgan odamni olib keldik, deya ma’lumot berishdi. O‘sha kundan boshlab, men hech qanday sababsiz 97 kun qamoqda saqlandim. Qamoqda o‘tirgan paytim Nodir To‘raqulov tomonidan qo‘rqitilib, chiqishimning sharti sifatida qarindoshlarim orqali 475 ming dollar pul to‘plab berdim. Bilishimcha, Nodir To‘raqulov o‘sha paytda o‘ziga to‘q, boylarni shu tarzda qo‘rqitib, pul olib kelgan ekan, deydi murojaatchi Islom Hamroyev.
Murojaatchi fuqaroning aytishicha, u 475 ming dollardan tashqari uyi tintuv qilingan paytda ham ko‘p mablag‘ini oldirib qo‘ygan.
Nodir To‘raqulov meni asossiz ravishda DXX (MXX) tergov hibsxonasida 97 kun ushlab turgan. Uyimni tintuv qilib, tintuv vaqtida chiqqan 11 ming dollar, 195 million so‘m pul va 25 turdagi tilla buyumlarimni ham tortib olgan. Ayni kungacha murojaat qilmagan tashkilotim qolmadi. Pullarim qayerdaligini hozirgacha bilmayapman va ololmayapman, deydi murojaatchi.
Fuqaroning aytishicha, u ayni kunga qadar Bosh prokuraturaga 9 marotaba, Adliya vazirligiga 3 marotaba, ombudsman va Milliy markazga ham murojaat qilgan. Ammo natija chiqmagan.
Oradan 11 yilga yaqin vaqt o‘tgan bo‘lishiga qaramasdan, menga yetkazilgan zarardan o‘zimga kela olmayapman. Butun mol-mulkimdan ajralganman. Hozirda ishsizman. Birorta murojaatim mas’ul idoralar tomonidan chuqur o‘rganilmadi. Faqatgina “o‘rganilmoqda”, “sizga ma’lum qilinadi”, degan javobdan nariga o‘tilmayapti, deydi u.
Milliy xavfsizlik xizmatining (hozirgi DXX) sobiq tergovchisi Nodir To‘raqulov 16 yillik qamoqqa hukm etilgan. Xorijiy OAV hamda ijtimoiy tarmoqlarda tarqalgan xabarlarga ko‘ra, Oliy sud harbiy hay’atining 2018-yil 25-oktyabrda hukmi chiqqan.
Aytilishicha, To‘raqulov qamoq jazosidan tashqari eng kam ish haqining 400 baravari (81 092 000 so‘m) miqdorida jarimaga ham tortilgan. Qayd etish kerakki, Nodir To‘raqulov hibsga olingani 2018-yilning boshida ma’lum bo‘lgan edi. O‘zbekiston Respublikasi Harbiy prokuraturasi tomonidan unga nisbatan Jinoyat kodeksining bir qator moddalari bilan jinoyat ishi qo‘zg‘atilib, Surxondaryo viloyatidagi faoliyati davomida sheriklari bilan nafaqat mahalliy, balki xorijiy tadbirkorlarning biznesini tortib olish, fuqarolarga nisbatan zo‘ravonlik qilish, narkotik savdolarini tashkil etish kabi jinoyatlarga aloqadorligi, Denov va Termiz shaharlarida unga tegishli “Malika Gold” restorani, “Orifa” saunalari borligi aytilgan.
Izoh (0)