O‘zbekiston JST bo‘yicha Pokiston va Tailand bilan muzokaralarni yakunladi

O‘zbekiston Jahon savdo tashkilotiga a’zo bo‘lish bo‘yicha Pokiston va Tailand bilan ikki tomonlama muzokaralarni yakunladi.

Islom Respublikasining JSTdagi doimiy vakili Ali Sarfraz Husaynning LinkedIn’da ma’lum qilishicha, O‘zbekiston Pokiston vakillari 7-dekabr kuni tegishli protokolni imzoladi. Uchrashuvda O‘zbekiston bosh vaziri o‘rinbosari Jamshid Xo‘jayev ham ishtirok etdi.

“Ushbu protokol qardosh mamlakatni Jahon savdo tashkilotiga a’zo bo‘lishga yaqinlashtiradi”, deb yozdi Sarfraz Husayn.

Shu kuni Tailandning JSTdagi vakili Pimchanok Pitfild O‘zbekistonning tashkilotga a’zo bo‘lishi to‘g‘risidagi protokolni imzolaganini ma’lum qildi.

“Biz O‘zbekistonning ko‘p tomonlama savdo tizimiga tez orada qo‘shilishini qo‘llab-quvvatlaymiz va JST oilasiga a’zolik O‘zbekistonga ko‘proq savdo va investitsiyalar olib kelishiga ishonamiz. Ikki tomonlama darajada bu mavjud savdo aloqalarini mustahkamlash va kelajakda xalqlar o‘rtasidagi hamkorlikni yanada rivojlantirishga intilishimizning tasdig‘idir”, deb yozdi u LinkedIn’da.

So‘nggi ikki oy ichida O‘zbekiston Filippin, AQSH, Xitoy, Salvador va Filippin bilan JSTga qo‘shilish bo‘yicha kelishuvlarga erishdi.

O‘zbekistoning JSTga a’zo bo‘lish harakatlari

O‘zbekistonning JSTga a’zo bo‘lishi bo‘yicha ishchi guruh 1998-yilda tashkil etilgan edi. Keyingi yillarda ushbu ishchi guruh faqat uch marta uchrashdi va 2005-yillarning o‘rtalariga kelib bu borada xalqaro ekspertlar bilan uchrashuvlar to‘xtab qolgandi. O‘zbekistonning JSTga a’zo bo‘lish jarayoni 2020-yil iyul oyida bo‘lib o‘tgan ishchi guruhning to‘rtinchi yig‘ilishi bilan rasman qayta tiklandi. Shundan so‘ng 2022-yil iyun, 2023-yil mart va 2023-yil noyabr oylarida yana uchta uchrashuv bo‘lib o‘tdi.

2023-yil sentyabrida Shavkat Mirziyoyev BMT Bosh assambleyasining 78-sessiyasi doirasida Jahon savdo tashkiloti (JST) bosh direktori Ngozi Okonjo-Iveala bilan uchrashuv o‘tkazgandi. Unda JST bosh direktori O‘zbekiston tomonidan tashkilotga a’zo bo‘lish borasida ko‘rilayotgan choralarni yuqori baholagan. Ngozi Okonjo-Iveala JST kotibiyati O‘zbekistonning sa’y-harakatlarini to‘liq qo‘llab-quvvatlashini aytgan hamda mamlakat yaqin kelajakda tashkilotga qo‘shilishiga ishonch bildirgandi.

2024-yil fevralida O‘zbekistonda 5 ta qonun JST bitimlariga uyg‘unlashtirildi.