Bugun, 29-iyul kuni prezident Shavkat Mirziyoyev harbiy taʼlim tizimini takomillashtirishga oid takliflar taqdimoti bilan tanishdi. Bu haqda davlat rahbari matbuot xizmati xabar berdi.
Maʼlum qilinishicha, 20 dan ortiq xorijiy davlatning sohaga oid ilg‘or tajribalari o‘rganilgan. Harbiy taʼlimni isloh qilish bo‘yicha yangi milliy model ishlab chiqilgan.
Taklifga ko‘ra, Qurolli kuchlar akademiyasi isloh qilinib, uning negizida Harbiy xavfsizlik va mudofaa universiteti tashkil etilishi ko‘zda tutilmoqda.
Mudofaa vazirligining barcha harbiy taʼlim muassasalari – 5 ta institut, Serjantlar tayyorlash oliy maktabi hamda Aviatsiya va uchuvchisiz uchish apparatlari mutaxassislarini tayyorlash markazi institut maqomida mazkur universitet tarkibiga o‘tkaziladi. Bu markazlashgan vertikal tizimni hosil qilib, qo‘shinlarning jangovar salohiyatini oshirish, dual taʼlimni kengaytirish, ilmiy tadqiqotlarni amaliyotga tatbiq etishga xizmat qiladi. Masalan, Serjantlar tayyorlash oliy maktabida armiyaning asosiy tayanchi bo‘lgan serjantlarni o‘qitish, ularda yetakchilik qobiliyatini shakllantirish, zamonaviy qurollar va yangi taktik usullar bo‘yicha ko‘nikmalarini oshirishning yangi tizimi joriy etiladi.
Yangiliklardan yana biri – tor doiradagi ixtisosliklar bo‘yicha “2+2” tartibi yo‘lga qo‘yilishidir. Yaʼni psixolog, aloqachi, taʼminotchi, omborchi kabi 18 xil yondosh soha mutaxassislari boshqa oliy taʼlim muassasalarining 2-bosqich talabalari orasidan saralab olinadi.
Iqtidorli yoshlarni qo‘llab-quvvatlash maqsadida, yangi o‘quv yilidan boshlab, bitiruvchi bosqich kursantlari uchun tanlov asosida “Oliy bosh qo‘mondon” davlat stipendiyasi joriy etiladi. Mazkur stipendiya sohibi bakalavriatni tamomlaganidan so‘ng 5 yil mobaynida oliy harbiy taʼlim muassasalarining magistraturasiga imtihonlarsiz qabul qilinadi.
Yana bir eʼtiborli jihati, endilikda oliy harbiy taʼlim muassasalarining 36 ta taʼlim yo‘nalishi bitiruvchilari biryo‘la ikkita diplom – fuqarolik va harbiy kasbga mo‘ljallangan mutaxassislik egasi bo‘ladi. Bu ularning harbiy xizmatdan keyin ham faol ishlashi imkonini beradi.
Ushbu o‘zgarishlarga yarasha harbiy pedagoglarni saralash va tanlashga ham talab kuchayadi. Jumladan, harbiy pedagoglarni yetakchi xorijiy davlatlarda o‘qitish tizimi yo‘lga qo‘yiladi.
Taqdimotda mazkur takliflar maʼqullandi va ularni amaliyotga samarali tatbiq etish bo‘yicha ko‘rsatmalar berildi.
Izoh (0)