Turkish Airlines aviakompaniyasining Istanbuldan Antaliyaga uchayotgan samolyoti uchish-qo‘nish yo‘lagida tutay boshladi. Yo‘lovchilar zudlik bilan evakuatsiya qilindi. Bu haqda Milliyet xabar berdi.
Ijtimoiy tarmoqlarda aeroportdagi vaziyatni aks ettiruvchi videolar tarqaldi. Boeing 777 samolyoti Antaliya aeroportiga qo‘ngandan so‘ng shassisidan tutun chiqishni boshlagan. Aviakompaniya yo‘lovchilar xavf ostida qolmagani, biroq ehtiyot chorasi sifatida samolyotdan evakuatsiya qilinganini aytdi.
Yo‘lovchilarimiz o‘z vaqtida xavfsiz joyga ko‘chirildi, jabrlanganlar yo‘q. Vakolatli mutaxassislar havo kemasini texnik ko‘rikdan o‘tkazishni boshladi. Dastlabki tekshiruvlar natijasida tutun chiqishiga gidravlik quvurning texnik nosozligi sabab bo‘lgani aniqlandi, deyiladi Turkish Airlines matbuot xizmati bayonotida.
Jami reysning 247 nafar yo‘lovchisi va 13 nafar ekipaj a’zosi evakuatsiya qilingan. Turkiya Transport vazirligi hodisani o‘rganish va baholashni boshlagan.
20-iyul kuni AQSHning Los Anjeles xalqaro aeroportidan havoga ko‘tarilgan Boeing 767-400 samolyotining dvigateli yonib ketgandi. Samolyotda to‘qqiz nafar ekipaj a’zosi va 226 nafar yo‘lovchi bo‘lgan.
Ular Atlantaga yo‘l olgan, biroq parvoz vaqti uchoqning chap dvigatelida muammo yuzaga kelgan. Natijada uchuvchi samolyotni ortga qaytarishga majbur bo‘lgan. Barcha yo‘lovchilar samolyot bortidan eson-omon evakuatsiya qilingan edi.
Izoh (0)