G‘azo hukumati ommaviy axborot vositalari idorasi anklavda ocharchilik va inqirozning oldini olish uchun haftasiga 500 ming qopdan kam bo‘lmagan un lozimligini ta’kidladi. Bu haqda Al Jazeera xabar berdi.
Telegram’da e’lon qilingan OAV bayonotida aytilishicha, G‘azoga yuzlab yordam mashinalari kirib kelgani haqida yolg‘on xabarlar tarqalgan.
“Biz bu da’volarni qat’iyan rad etamiz, chunki bu mutlaqo haqiqatga to‘g‘ri kelmaydi. Biz dunyoning barcha davlatlarini qamalni zudlik bilan buzishga, o‘tish yo‘llarini ochishga, bolalar ozuqasining kirishiga ruxsat berishga va G‘azo sektorida qamalda qolgan 2,4 milliondan ortiq odamga yordam berishga chaqiramiz”, deyilgan OAV bayonotida.
Sektorda ocharchilik davom etmoqda
G‘azo shifoxonalarida bugungacha Isroilning blokadasi fonida ocharchilik va to‘yib ovqatlanmaslik bilan bog‘liq 115 dan ortiq o‘lim qayd etilgan. Xususan, 22-iyul kuni bir sutkada to‘yib ovqatlanmaslik va ocharchilikdan 15 kishi, jumladan, 4 nafar bola halok bo‘lgan.
Avvalroq tibbiy manbalar diabetga chalingan bola va chaqaloq ham o‘tkir oziq-ovqat tanqisligidan aziyat chekib vafot etganini ma’lum qilgandi. G‘azo o‘z tarixidagi eng yomon gumanitar inqirozlardan birini boshdan kechirmoqda. Xususan, 2023-yil oktyabr oyidan beri Isroil tomonidan davom ettirilayotgan genotsid fonida anklav bo‘ylab ocharchilik keng tarqalgan. Isroil 2-martdan beri barcha chegara o‘tish joylarini yopib, oziq-ovqat va tibbiy yordamning kirishini to‘sib qo‘ygan. Oqibatda bolalar va surunkali kasallikka chalingan bemorlarda o‘tkir to‘yib ovqatlanmaslik alomatlari paydo bo‘lgan.
Isroil 2023-yil oktyabr oyidan beri G‘azo sektorida 59 mingdan ortiq falastinlikning — aksariyat ayollar va bolalarning — o‘limiga sabab bo‘ldi. Harbiy harakatlar anklavni vayron qildi, sog‘liqni saqlash tizimini izdan chiqardi va kuchli oziq-ovqat tanqisligiga olib keldi.
Izoh (0)