G‘azoda 4 yashar qizcha ochlikdan vafot etdi

Isroil oziq-ovqat yetkazib berishni to‘xtatganidan so‘ng G‘azoda 4 yoshli Razan Abu Zaher vafot etdi. Bu haqda CNN xabar berdi.

Qizaloq ochlik va yetarli ovqatlanmaslik oqibatida G‘azo markazidagi shifoxonada jon bergan. G‘azoda urush boshlanganidan beri kamida 76 nafar bola va 10 nafar katta yoshli inson ochlikdan o‘lgan. Ularning aksariyati mart oyida Isroil blokada e’lon qilganidan keyin vafot etgan.

Razan so‘nggi uch kun ichida ochlikdan o‘lgan kamida to‘rtta boladan biridir. Qurbonlar orasidagi eng kichigi atigi uch oylik bo‘lgan. So‘nggi 24 soatda ocharchilik sabab 18 kishi halok bo‘lgan, deydi G‘azo Sog‘liqni saqlash vazirligi.

CNN nashri bir oy oldin Razan bilan uchrashgan. O‘shanda qizcha juda ozib ketgan va holsiz bo‘lgan. Onasi Tahrir Abu Daher “sut sotib olishga pulim yo‘q”, deya shikoyat qilgan.

Urushdan oldin sog‘lig‘i yaxshi edi, lekin urush boshlanganidan so‘ng to‘yib ovqat yemagani sabab ahvoli yomonlashdi. Unga quvvat beradigan hech narsa yo‘q, degan ona.

Bu suhbat 23-iyun kuni bo‘lib o‘tgandi. O‘shanda Razan 12 kundan beri kasalxonada yotgan. U yana 27 kun hayot uchun kurashgan. Isroil yordam yetkazishni to‘xtatganini uni HAMAS o‘g‘irlayotgani bilan izohlagan. HAMAS esa bu ayblovlarni rad etgan.

Isroilning G‘azoga gumanitar yordam oqimini nazorat qiluvchi COGAT agentligiga ko‘ra, urush boshlanganidan buyon G‘azoga taxminan 67 mingta oziq-ovqat yuk mashinasi kirib, 1,5 million tonnaga yaqin mahsulot yetkazilgan.