Ukraina prezidenti Vladimir Zelenskiy 29-iyul kuni 60 yoshdan oshgan fuqarolarga harbiy holat davrida armiyaga ixtiyoriy tarzda qo‘shilishga ruxsat beruvchi qonunni imzoladi. Bu haqda The Kyiv Independent xabar berdi.
Yangi qonunga ko‘ra, katta yoshli ko‘ngillilar jangovar bo‘lmagan hamda ixtisoslashtirilgan lavozimlarda xizmat qilishlari mumkin bo‘ladi. Bu Rossiya bilan davom etayotgan urush fonida harbiylar yetishmovchiligiga duch kelayotgan Ukraina armiyasi uchun katta imkoniyat yaratadi.
Endilikda 60 yoshdan oshgan shaxslar harbiy tibbiy komissiyadan o‘tib, harbiy bo‘linma komandiri ruxsatini olsa, bir yillik harbiy xizmat shartnomasini imzolashi mumkin bo‘ladi. Zobit bo‘lishni istaganlar esa Bosh shtab yoki boshqa tegishli harbiy tuzilmalar tomonidan ham tasdiqlanishi talab etiladi.
Yollangan harbiylar ikki oylik sinov muddatidan o‘tadi. Agar bu davr mobaynida ular xizmatga yaroqsiz deb topilsa, shartnoma muddatidan oldin bekor qilinadi. Qonunda xizmat uchun maksimal yosh chegarasi belgilanmagan, biroq harbiy holat tugaganidan so‘ng barcha shartnomalar avtomatik tarzda bekor qilinadi. Ilgari surilgan yangi qonun texnik, logistika va yordamchi xizmatlarda tajribali mutaxassislar yetishmovchiligini bartaraf etishga xizmat qilishi kutilmoqda.
2024-yil oxirida Donetsk viloyatida Rossiya hujumlari kuchaygan bir paytda Ukraina jiddiy askar tanqisligi muammosiga duch kelgandi. Shundan so‘ng, hukumat bu inqirozni yumshatish maqsadida safarbarlik qamrovini kengaytirish va ko‘ngillilar uchun qo‘shimcha rag‘batlar joriy etishga kirishgan.
Ma’lumot uchun, Ukrainada 2024-yil aprel oyida armiyaga chaqiruv yoshi 27 dan 25 yoshga tushirilgan edi. 2025-yil fevralidan boshlab esa 18–24 yosh oralig‘idagi ko‘ngillilar uchun bir yillik harbiy shartnomalar joriy qilinib, moliyaviy bonuslar taklif etilgan.
Izoh (0)