Rossiya armiyasi 29-iyulga o‘tar kechasi Ukrainaning Zaporojye viloyatidagi axloq tuzatish koloniyasiga aviabomba tashladi. Bu haqda viloyat administratsiyasi rahbari Ivan Fedorov xabar berdi.
Fedorovning so‘zlariga ko‘ra, Zaporojye dastlab 8 ta FAB aviatsiya bombasi bilan o‘qqa tutgan. Aviazarbalardan biri axloq tuzatish koloniyasiga qaratilgan.
16 kishi halok bo‘ldi, 35 kishi jarohat oldi. Jabrlanganlarga barcha zarur tibbiy yordam ko‘rsatilmoqda, dedi ukrainalik mulozim.
Hujum oqibatida binolar vayron bo‘lgan, shuningdek, atrofdagi xususiy uylarga ham zarar yetgan. Ukraina prezidenti ofisi rahbari Andrey Yermak hujumga munosabat bildirib, bu Rossiyaning navbatdagi “harbiy jinoyati” ekanini va agar “ruslarni to‘xtatmasa, harakatlar davom etishi”ni ta’kidlagan.
Ayrim shaxslar orqali AQSHga tahdid solayotgan Putin rejimi iqtisodiy va harbiy zarbalarga duchor bo‘lishi kerak. Bu uni urush olib borish imkoniyatidan mahrum qiladi. Putin harbiy-sanoat majmuasini kengaytirayotgan va KXDRni urushga jalb qilishga qodir ekan, Yevropada urush xavfi haqiqatan ham mavjud, degan Yermak.
Rossiya harbiylari Zaporojye viloyati va viloyat markazini muntazam ravishda o‘qqa tutib kelmoqda. Buning uchun ular dronlar, raketalar va boshqariladigan aviatsiya bombalarini qo‘llamoqda. Masalan, 26-iyulga o‘tar kechasi viloyat dronlar hujumiga uchragandi. Oqibatda bir nechta yong‘in sodir bo‘lgan, xususiy uy vayron bo‘lgan va fermer xo‘jaligining omboriga zarar yetgandi. Ukrainaga keng ko‘lamli bostirib kirishdan so‘ng, Rossiya qo‘shinlari Zaporojye viloyati hududining bir qismini egallab olgandi.
Izoh (0)