O‘zbekiston hukumati rahbari Abdulla Aripov bugun o‘tkazilgan yig‘ilishda metan narxini davlat tomonidan tartibga solish bekor qilinishini maʼlum qildi. Bosh vazir matbuot kotibining ma’lum qilishicha, prezident topshirig‘iga ko‘ra, non va bug‘doy narxlari erkinlashtirilgani kabi, metanning narxini ham joylarda raqobat asosida barqarorlashtirish choralari ko‘riladi.
1-avgust kuni O‘zbekiston bosh vaziri Abdulla Aripov prezident topshirig‘iga binoan vazirlik va idoralar rahbarlari ishtirokida yoqilg‘i-energetika masalalari bo‘yicha yig‘ilish o‘tkazdi, deb xabar qildi hukumat rahbari matbuot kotibi Bekzod Hidoyatov.
Uning so‘zlariga ko‘ra, yig‘ilishda “metan narxining yuqori chegarasini” bekor qilish masalasi muhokama qilindi, endilikda davlat bu sohada narx belgilashga aralashmaydi.
Bosh vazir prezidentning Raqobatni rivojlantirish qo‘mitasi, Bosh prokuratura va Energetika vazirligiga yoqilg‘i quyish shoxobchalari, jumladan, propan gazi bo‘yicha raqobat muhitini yaratish orqali narxlarning keskin oshishiga yo‘l qo‘ymaslik choralarini ko‘rish bo‘yicha topshiriqlarini e’lon qildi.
“Davlatning narxlarni tartibga solishga aralashuvi raqobat muhitining buzilishiga olib keladi. Shu sababli, narxlarning yuqori chegarasi bo‘lmaydi; Raqobat qo‘mitasi va Bosh prokuraturaga narxlarni barqarorlashtirish bo‘yicha prezident topshirig‘i berildi. Bu xuddi non va bug‘doy narxlarini liberallashtirish misolida bo‘lgani kabi amalga oshiriladi”, dedi Bekzod Hidoyatov.
Bosh vazir matbuot kotibining ta’kidlashicha, tadbirkorlarga narxlarni belgilashda erkinlik berish “o‘zlari xohlagan narsani qilish imkoniyatini anglatmaydi”. Shu munosabat bilan to‘rtta sektor rahbarlari narxlarning sun’iy ravishda bir necha barobar oshirilmasligini ta’minlaydi.
Bundan tashqari, metan shoxobchalari siqilgan gaz sarfini hisoblash uchun Uzinfocom’dan tizim o‘rnatishi kerak bo‘ladi.
Ijtimoiy tarmoqlarda Andijon viloyatida gaz quyish shoxobchalarining maksimal narxi 3950 so‘mdan belgilanishi haqida ma’lumot tarqaldi. Bekzod Hidoyatov bu haqiqat emasligini, hokimliklarga bunday ko‘rsatma berilmaganini ta’kidladi.
Tez orada Energetika vazirligi, Raqobat qo‘mitasi va Bosh prokuratura tomonidan sohadagi o‘zgarishlar haqida alohida matbuot anjumanlari o‘tkaziladi.
Iqtisodchi Otabek Bakirov avvalroq metan narxining yuqori chegarasi bekor qilinishini to‘g‘ri qaror deb atagan edi. Uning so‘zlariga ko‘ra, “hukumat narxlarni belgilab, amaldorlar limit taqsimlab, jadvallarni o‘rnatib, kimga gaz berish va gaz bermaslikka qaror qiladigan” rejimdan voz kechish kerak.
2024-yil 25-may kuni Vazirlar Mahkamasining metan gaz uchun belgilangan eng baland chakana narxning amal qilish muddatini uzaytirish haqidagi qarori qabul qilingan va 1-avgustga qadar avtomobillarga gaz to‘ldirish shoxobchalarida bir kub metr metan gazning eng yuqori narxi 3750 so‘m etib belgilangan edi.
Moliya vazirligi axborot xizmatining “Daryo”ga ma’lum qilishicha, metan gaz uchun belgilangan eng baland chakana narxning amal qilish muddati uzaytirilmagan.
Qayd etish kerakki, 2023-yilning sentyabr oyida qabul qilingan hukumat qarori bilan avtomobillarga gaz to‘ldirish shoxobchalarida metan gaz narxi dastlab 3250 so‘m, shu yilning aprelidan 3350 va 1-iyundan boshlab esa 3750 so‘mdan oshib ketmasligi belgilangan edi.
Endilikda tadbirkorlar metan gaz narxini o‘zlari mustaqil belgilaydi. Shu bilan birga, to‘rtta sektor rahbarlari narxlarning sun’iy ravishda bir necha barobar oshirilmasligini nazorat qilib boradi.
Izoh (0)