Mamlakatda har yili 11 ming nomdagi kitoblar 40 million nusxada nashr qilinmoqda. Bu haqda 8-iyuldagi Oliy Majlis Qonunchilik palatasi yig‘ilishida deputat Zuhra Mirg‘oziyeva maʼlum qildi.
Zuhra Mirg‘oziyevaning aytishicha, oxirgi to‘rt yilda O‘zbekistondagi nashriyotlar soni 3,5 barobarga ko‘paygan va 601 taga yetgan.
“Shundan xususiy nashriyotlar soni 538 tani tashkil etmoqda. Nashriyotlarning ishlab chiqarish quvvati ikki barobar oshib, har yili o‘rtacha 11 ming nomda jami 40 million nusxada adabiyotlar nashr etilmoqda. Sohaga 25 million dollar to‘g‘ridan-to‘g‘ri investitsiyalar kiritildi. 2025-yil 1-yanvardan boshlab nashriyot korxonalari foyda solig‘ini to‘lashdan besh yil muddatga ozod etildi”, dedi deputat.
Eslatib o‘tamiz, 2023-yilda Shavkat Mirziyoyev O‘zbekiston prezidentligiga nomzod sifatida toshkentlik saylovchilar bilan uchrashgandi. O‘shanda kelgusi yetti yilda kitoblar nashr qilish va kutubxonalarga qanday e’tibor qaratilishi haqida rejalar aytilgan.
“Har yili 100 ta eng yaxshi badiiy asar hamda bolalar va o‘smirlarga mo‘ljallangan 50 ta badiiy kitoblar yaratish uchun ijodiy buyurtma berilib, mualliflarga 100 million so‘mdan qalam haqi to‘lanadi. Bu kitoblar 20 ming nusxadan nashr qilinib, maktablar va kutubxonalarga bepul beriladi. Bunga har yili 200 milliard so‘m yo‘naltiramiz. Shuningdek, kelgusi yetti yilda kutubxonalarning 40 millionga yaqin kitob fondi to‘liq raqamlashtiriladi va ularning yagona katalogi yaratiladi. Umuman, 2030-yilga qadar mamlakatimizdagi barcha kutubxonalar to‘liq ta’mirlanadi. Shu maqsadda 500 milliard so‘m ajratamiz”, degan ayni paytdagi mamlakat prezidenti.
Shu bilan birga, Shavkat Mirziyoyev maktab kutubxonachilarining ish haqi pedagog xodimlar oyligiga tenglashtirilishini ham ma’lum qilgan.
O‘tgan yilgi kitoblar festivalida “Akademnashr” nashriyoti rahbari Sanjar Nazar mamlakatda 2020-yildan keyin kitoblar sotuvida o‘sish to‘xtab qolganini aytgan.
Avvalroq Jinoyat kodeksiga O‘zbekistonda kitob o‘qigan mahbusning jazo muddati qisqartirishga oid modda kiritilayotgani xabar qilingandi. Kitob o‘qishga jalb qilish orqali mahkumlarni axloqan tuzatish nazarda tutilgan. Mahkum ro‘yxatdagi bitta kitobni o‘qib, imtihon topshirsa, uning qamoqdagi jazosi 3 kunga qisqartiriladi. Bunda yiliga ko‘pi bilan 10 ta kitob o‘qish mumkinligi belgilanish qayd etilgan.
Izoh (0)