Joriy yil I yarmida o‘tgan yilning mos davridagidan 16,8 trln so‘m ko‘proq soliq yig‘ildi. Bu haqda Soliq qo‘mitasi hisobotida maʼlumot berilgan.
2025-yil yanar—iyun oylarida O‘zbekiston byudjetiga soliq tushumlari miqdori 102,6 trln so‘mni tashkil etdi. Mazkur ko‘rsatkich 2024-yil mos davriga (85,8 trln so‘m) nisbatan 20 foizga ko‘p.
“Har bir nafar xodimga 2024-yil I yarim yillikda o‘rtacha 9,3 mlrd so‘mdan soliq tushumi to‘g‘ri kelgan bo‘lsa, joriy yilda ushbu ko‘rsatkich +1,8 mlrd so‘mga (20 foiz) ortib, 11,2 mlrd so‘mga yetdi”, deya qayd etgan manba.
Mamlakat hududlari kesimida eng ko‘p soliq tushumi Toshkent shahrida qayd etilgan —17,6 trln so‘m. Bu o‘tgan yil mos darvidagidan 31,4 foizga ko‘p. Shu bilan birga, Toshkent viloyatida 4,7 trln so‘m (o‘sish 25,8 foiz), Farg‘ona (+24,5 foiz) va Samarqand (+21,4 foiz) viloyatlarida 3,1 trln so‘mdan, boshqa hududlardan sezilarli darajada yuqori miqdorda tushum qilingan.
Eng kam soliq tushumlari Sirdaryo viloyatida taʼminlangan — 1,1 trln so‘m (o‘sish 28,3 foiz). O‘z navbatida yana nisbatan kam soliqlar Navoiyda 1,3 trln (+22,4 foiz) va Jizzaxda 1,3 trln so‘m (16,5 foiz) yig‘ilangan.
Respublika miqyosida yuqori o‘sish surʼati yer qaʼridan foydalanganlik uchun soliq bo‘yicha kuzatilgan. Yaʼni mazkur turdagi soliqdan tushumlar 2024-yil I yarmidagi raqamlarga qaraganda 23,4 foizga (1,9 trln so‘m) ortgan. Shu bilan birga, qo‘shilgan qiymat solig‘i ham 20,3 foizga (3,6 trln so‘m) ko‘paydi.
Soliq turlari bo‘yicha tushumlar va miqdorlar o‘sishi quyidagicha:
- QQS — 21,4 trln so‘m;
- foyda solig‘i —22,5 trln so‘m (+17,5 foiz) ;
- daromad solig‘i — 19,9 trln so‘m (+17,5 foiz) ;
- yer qaʼridan foydalanganlik uchun soliq — 10,3 trln so‘m;
- aksiz solig‘i — 9,3 trln so‘m (+15,6 foiz) ;
- yer solig‘i — 4,8 trln so‘m (+18,4 foiz) ;
- mol-mulk solig‘i — 4,1 trln so‘m (+16,4 foiz) ;
- aylanmadan olinadigan soliq —1,6 trln so‘m (+14,8 foiz);
- suv resurslaridan foydalanganlik uchun soliq —0,5 trln so‘m (+7,2 foiz).
Yarim yil mobaynida qo‘shilgan qiymat solig‘i to‘lovchilar soni 14,5 foizga o‘sib, 227,9 mingtaga yetdi. Foyda solig‘i to‘lovchilar ham 14, 5 foiz ko‘payib, 227,9 mingta bo‘lgan.
Biroq daromad solig‘i to‘lovchilar joriy yil I yarmida o‘tgan yil mos davridagidan 0,7 foizga (6 mln 23 mingtadan 5 mln 980 mingta qolgan) kamaygan.
Aylanmadan olinadigan soliq to‘lovchilar 2024-yil I yarmidagi 344,2 tadan joriy yil iyuligacha 332 mingta qolgan (pasayish 35 foiz).
Mol-mulk solig‘i to‘lovchilar 6,3 foiz ko‘payib, 82,6 mingtaga yetgan.
Joriy yil dastlabki yarmida o‘zini o‘zi band qilgan shaxslar soni o‘tgan yil mos davridagidan 56 foizga ko‘paydi. Yaʼni 2024-yil dastlabki olti oyida ular soni 3,55 mln nafar bo‘lgan, joriy yil I yarmida 5,54 mln nafarga yetdi.
Izoh (0)