“Real Madrid” yozgi transfer oynasida faol harakat qilmoqda. “Qaymoqranglilar” Londonning “Arsenal” klubi himoyachisi Uilyam Salibani o‘z safiga qo‘shib olish uchun “kanonirlar” bilan muzokaralarni boshladi. Klub fransiyalik futbolchi uchun 90 million yevro hamda ikki nafar futbolchisini taklif qildi.

Salibaning Angliya Premyer Ligasidagi barqaror o‘yini “qirollik klubi” e’tiborini tortgan. “Real” uni uzoq muddatli rejasining asosiy figuralaridan biri sifatida ko‘rmoqda. Fichajes nashriga ko‘ra, taklif qilingan ikki futbolchidan biri — turkiyalik yarim himoyachi Arda Gyuler. U kelasi mavsum oxirigacha “Arsenal”ga ijaraga berilishi mumkin. Sababi, hozirda u “Real”da doimiy o‘yin amaliyotiga ega emas.
Ikkinchi futbolchi esa “Real Madrid” akademiyasidan yetishib chiqqan markaziy himoyachi — Raul Asensio. Uning transfer qiymati 40 million yevro deb baholanmoqda va u “Arsenal”ning kelajakdagi rejalariga mos futbolchi sifatida ko‘rilmoqda.
Hozircha London klubidan rasmiy javob bo‘lmagan, biroq “Arsenal” rahbariyati bu taklifni jiddiy ko‘rib chiqmoqda. Saliba jamoaning muhim figuralaridan biri bo‘lsa-da, pul va futbolchilardan iborat taklifni rad etish ingliz klubi uchun qiyin kechishi mumkinligi aytilmoqda.
Izoh (0)