Rossiyaning yetakchi aviakompaniyasi Aeroflot xakerlar nishoniga tushdi. Natijada ichki tizimlar faoliyati izdan chiqib, bu 40 dan ortiq reyslarning bekor qilinishga sabab bo‘ldi. Hujum ortida o‘zini Silent Crow deb ataydigan belaruslik xakerlar guruhi turgani aytilmoqda.
Aviakompaniya rasmiy bayonot chiqardi. Unda elektron tizimlarda uzilishlar yuzaga kelgani va bu parvozlar jadvalining qayta ko‘rib chiqilishiga olib kelgani haqida so‘z boradi. Yo‘lovchilarga vaziyatdan aeroport veb-sayti, elektron e’lonlar va boshqa axborot vositalari orqali xabardor bo‘lib turish tavsiya etilgan.
“Yo‘lovchilar bizning xizmatlarimizdan foydalanishda muammolarga duch kelishlari mumkin. Texnik jamoamiz muammoni imkon qadar tezroq bartaraf etish ustida ishlamoqda”, deyiladi kompaniya bayonotida.
Moskvaning “Sheremetev” aeroportida kamida 42 ta reys bekor qilingani haqida xabarlar bor. Buning natijasida yuzaga kelgan tartibsizliklar sabab yuzlab yo‘lovchilar terminallarda qolib ketgan.
Hujum uchun javobgarlikni o‘z zimmasiga olgan Silent Crow amaliyotni “uzoq muddatli va keng ko‘lamli operatsiya” deb ta’rifladi. Guruh da’vosicha, Aeroflot’ning axborot texnologiyalari infratuzilmasi to‘liq ishdan chiqarilgan. Xakerlar, bundan tashqari xodimlarning shaxsiy kompyuterlari, parvozlar haqidagi ma’lumotlar bazalari, kuzatuv tizimlari va telefon tinglov qurilmalari ustidan nazorat o‘rnatilganini ta’kidlagan.
Rossiya Bosh prokuraturasi xakerlar hujumi Aeroflot tizimidagi muammolarga sabab bo‘lganini tasdiqladi va holat yuzasidan jinoyat ishi qo‘zg‘atilganini ma’lum qildi.
Ma’lumot uchun, Aeroflot Rossiyaning eng yirik aviakompaniyasi bo‘lib, mahalliy va xalqaro yo‘nalishlarda minglab reyslarni amalga oshirib keladi. Xakerlik hujumi ortidan parvozlar va axborot xavfsizligi masalalari yana bir bor kun tartibiga chiqdi.
Izoh (0)