Janubiy Koreyada 2025-yilning yoz oylarida jaziramadan vafot etganlar soni 13 nafarga yetdi. Bu haqda mamlakat sog‘liqni saqlash rasmiylari 30-iyul kuni ma’lum qildi.
Koreya kasalliklarni nazorat qilish va oldini olish agentligi (KDCA) ma’lumotlariga ko‘ra, 2025-yil may oyining o‘rtalaridan buyon 2768 nafar fuqaro quyosh urishi simptomlari bilan shoshilinch tibbiy yordamga murojaat qilgan, ularning 13 nafari vafot etgan.
Bu ko‘rsatkich 2024-yilning shu davriga nisbatan sezilarli darajada oshgan. Xususan, bemorlar soni 2,6 barobar, o‘lim holatlari esa 4 tadan 13 tagacha — 3 barobar ortgan. 2025-yil kuzatilgan holatlarning 60,4 foizi quyosh urishi bo‘lgan bo‘lsa, 16,6 foizi issiqlik urishi, 13,5 foizi mushak tortishishi, 8 foizi esa hushdan ketish bilan bog‘liq bo‘lgan.
Mamlakatning aksariyat hududlarida jazirama sabab ogohlantirish e’lon qilingan. Koreya Meteorologiya Agentligi ma’lumotiga ko‘ra, 30-iyul kuni Tejon shahrida +38 daraja, Seul va Tegu shaharlarida esa +36 daraja havo harorati qayd etilgan.
Jeju orolidagi Sogvipxo shahrida 15 kundan buyon tropik tunlar kuzatilayotgan bo‘lsa, Seulda bu tunlarning soni ketma-ket 10 taga yetgan. Sinoptiklarning ogohlantirishicha, mamlakat bo‘ylab davom etayotgan jazirama yaqin kunlarda yanada kuchayadi.
Tropik tun — kechasi havo harorati +25 darajadan pastga tushmaydigan tunlardir. Bu atama odatda issiqlik to‘lqini davrida qo‘llanadi va inson salomatligiga sezilarli ta’sir ko‘rsatadi, chunki organizm tun davomida to‘liq sovib, dam ololmaydi. Tropik tunlarning xususiyatlari quyidagilardan iborat:
- odatda iyul–avgust oylarida, ya’ni yozning eng issiq davrida kuzatiladi;
- shaharlarda ko‘proq uchraydi, chunki asfalt, beton va binolar issiqlikni ushlab turadi.
So‘nggi yillarda iqlim o‘zgarishlari tufayli Janubiy Koreyada yoz oylarida kuchli jazirama tez-tez ro‘y bermoqda. Jumladan:
- 2023-yil yozida issiqlik bilan bog‘liq holatlardan 23 kishi vafot etgan, 4 mingdan ortiq fuqaro issiqlik urishi va boshqa kasalliklar bilan shifoxonaga yotqizilgan;
- 2022-yilda esa bunday holatlar nisbatan kam bo‘lgan: 9 kishi vafot etgan;
- 2018-yil esa Janubiy Koreya tarixidagi eng issiq yoz bo‘lgan. O‘shanda +40 darajadan ortiq harorat qayd etilib, 42 kishi vafot etgandi.
Izoh (0)