Mamlakat qishloq xo‘jaligida kosmik maʼlumotlardan foydalanish kengayadi. Bu haqda 31-iyul kuni prezident Shavkat Mirziyoyev o‘tkazgan yig‘ilishda maʼlum qilindi.
Prezident matbuot xizmati xabariga ko‘ra, yig‘ilishda qishloq xo‘jaligida kosmik maʼlumotlardan foydalanish va sohani raqamlashtirish ishlari muhokama qilingan.
Qayd etilishicha, tarmoqqa aerokosmik texnologiyalar joriy etilyapti. Bu qishloq va suv xo‘jaligidagi haqiqiy holatni, kamchiliklarni ochiq-oydin ko‘rsatib beradi.
Ikki yil mobaynida sohada foydalanilayotgan 4 million gektardan ziyod yerlar kosmik monitoring qilingan. Aniqlanishicha, hisobotlarda ko‘rsatilgan ayrim maydonlarda paxta ekilmagan, baʼzan esa zaxiradagi yoki egasi nomaʼlum yerlarga ekilgan. Shu sabab davlat tomonidan ajratiladigan imtiyozli kreditlarning maqsadli ishlatilishini masofaviy monitoring qiladigan tizim yo‘lga qo‘yilishi belgilandi.
“Iqlim o‘zgarishi va suv taqchilligidan kelib chiqib, yurtimizda kam suv talab qiladigan yangi navlar va agrotexnologiyaga o‘tilmoqda. Lekin ekinlarni sug‘orishda suv sarfi meʼyori hozirgi haqiqatdagi talabga javob bermasligi ko‘rsatib o‘tildi. Gidromodul rayonlashtirish yondashuvi ham eskirgan. Oqibatda kanallar oxirida joylashgan 3 mingdan ziyod fermerga suv yetib bormayapti. Qishloq va suv xo‘jaligi tizimidagi ilmiy institutlarni jalb qilgan holda sug‘orish meʼyori va gidromodul rayonlashtirishni to‘liq yangilash vazifasi qo‘yildi”, deyiladi manba xabarida.
Yig‘ilishda fermerlar sarflayotgan suvning haligacha aniq hisobi yo‘qligi aytilgan. Jarayonni raqamlashtirish, suv hisobini yuritish zarurligi taʼkidlangan. Barcha suv omborlariga “aqlli” hisoblagichlar o‘rnatib, suv miqdorini onlayn kuzatish, ulardagi loyqani kamaytirish vazifalari qo‘yilgan.
“Yer bilan suv qishloq xo‘jaligimiz taqdirini hal qiluvchi masala”, degan Shavkat Mirziyoyev.
Yig‘ilishda sohani raqamlashtirish masalasiga alohida eʼtibor qaratilgan.
“Hozir fermerlar yer, kredit, subsidiya va agroxizmatlar bo‘yicha 30 dan ortiq platformadan foydalanyapti. Buni osonlashtirish uchun ular birlashtirilib, ‘Raqamli qishloq xo‘jaligi’ yagona integratsion platformasi ishga tushiriladi. Endi dalasiga nima ekishni fermerning o‘zi hal qiladi. Buni platformaga ham uning o‘zi kiritadi. Natijada asosiy, takroriy va to‘qsonbosti ekinlar miqdori oldindan ko‘rinadi. Bu oziq-ovqat xavfsizligi, narx-navo barqarorligi va dehqonlarning daromadida juda muhim”, deya qayd etgan manba.
Yig‘ilishda bosh vazir o‘rinbosari Jamshid Qo‘chqorov boshchiligida oziq-ovqat xavfsizligini taʼminlash bo‘yicha komissiya tuzilishi belgilangan. Yetishmayotgan mahsulotni ko‘paytirish uchun imtiyozli kredit va subsidiya berilishi topshirilgan.
Sohada uchuvchisiz apparatlardan foydalanish ham rejalashtirilmoqda. Kuzda 100 dan ziyod zamonaviy dron olib kelinadi. Mutasaddilarga xususiy sektorni jalb etib, fermerlarga dronlar yordamida xizmatlarni yo‘lga qo‘yish bo‘yicha ko‘rsatma berildi.
Shu bilan birga, majlisda somonpoyalarni yoqishga chek qo‘yishning qonuniy asoslarini yaratish zarurligi aytilgan.
Kosmik tadqiqotlarda qurilish, kadastr, noruda konlari, o‘rmon va yaylov yerlari bo‘yicha ham tahlillar borligi taʼkidlanib, vazirlar va hokimlarga ularni o‘rganib, rejalar ishlab chiqish vazifasi qo‘yilgan.
Izoh (0)